بلیک ہول
چاہِ تاریک ہر اک شہر کی اس سمت جہاں
ریگ در ریگ ہے ویرانے کی دنیا آباد
کوئی زنداں نہیں ہر ایک بگولہ آزاد۔۔۔
نہ طلب عرضِ ہنر کی نہ تہِ لب فریاد۔۔۔
لیکن افسوس وہاں ہیں سبھی اب شہر نژاد
خامہ فرسا تھی جہاں پر مری پژمردہ گھٹن
صورتِ جھنڈ ہیں ہر ڈھب کے نئے نظم نگار
چاہِ تاریک !
مری دربدری یوں ہی نہیں
میں وہ آوارہ و سیلانی کہ دن اگتے ہی
پھر نکل جاؤں گا تا وقت کہ آواز رکے
ساز تھمیں
اور مغنی کا گلا رندھنے لگے۔۔۔
اک نیا گیت نئی موسقی ہے میری تلاش۔۔۔
میں نہ کائی ہوں – نہ گل ہوں نہ کوئی سنگِ محل
مجھ سے وحشی کو رکے رہنے سے مطلب کیا ہے !
حشر در حشر سفر کرتا ہوں تا ظلِّ الہ
فہم در فہم گماں ہے مری خاکستر اڑان
چاہِ تاریک ہر اک شہر کی اس سمت جہاں
