غزل
احتشام حسن
لگا نہ دل کو نہ آنکھوں کو جچ سکا کوئی
نہ تیرے نقش کو دل سے کھرچ سکا کوئی
ترے بغیر مرے رنگ اڑ گئے سارے
نہ حل ہوا کوئی مجھ میں نہ رچ سکا کوئی
مجھے بھی راس نہ آیا ترے سوا کوئی اور
تمام عمر تجھے بھی نہ پچ سکا کوئی
کہانی ناز و ادا تک نہ جا سکی یوں بھی
کہ تیری ایک نظر سے نہ بچ سکا کوئی
یہی کہے گا کہ تجھ سا حسیں نہیں دیکھا
جو تجھ سے مل کے اگر بول سچ سکا کوئ
سلگتے ہجر کی دفنائی راکھ جب سے حسن
جنون پھر مرے اندر نہ مچ سکا کوئی
