غزل
مری گلی سے وہ منہ پھیر کر تو آتے ہیں
زہے نصیب کہ مجھ کو نظر تو آتے ہیں
ہے سنگلاخ چٹانوں سے شہر اس کا گھرا
وہاں سے بھی مرے دریا گزر تو آتے ہیں
کبھی تو ہو گی ملاقات میری مرضی سے
اجاڑ جتنا ہو صحرا شجر تو آتے ہیں
وہ کر رہا ہے جدائی کا ذکر ہنس ہنس کے
ڈرا نہیں ہوں مگر دل میں ڈر تو آتے ہیں
کوئی بھی موت کی منزل تک آ نہیں سکتا
یہ زندگی ہے سفر ہم سفر تو آتے ہیں
بڑے سلیقے سے بچھڑے گا وہ اگر بچھڑا
ہمارا یار ہے اس کو ہنر تو آتے ہیں
تو کیا ہوا ہمیں گھیرا ہوا ہے مشکلوں نے
سمندروں کے سفر میں بھنور تو آتے ہیں
