غزل
نظامِ عدل کو جھنجھوڑنے کی کوشش کی
کبوتروں نے قفس توڑنے کی کوشش کی
چلو ! کوئی تو ہماری ڈگر پہ آ نکلا
چلو کسی نے تو سر پھوڑنے کی کوشش کی
میں چاہتا تھا اذیت میں موت کو دیکھوں
سو ایک بار اُسے چھوڑنے کی کوشش کی
میں اُس کے ہاتھ سے خود کو بگاڑ بیٹھا تھا
نہ جڑ سکا نہ کبھی جوڑنے کی کوشش کی
زمانہ جانتا ہے کون ، کس طرح ٹوٹا ؟؟
مرے عدو نے مجھے توڑنے کی کوشش کی
شکیل ! وقت کا پہیہ رُکا سا لگتا ہے
کسی نے آج مجھے چھوڑنے کی کوشش کی
