غزل
خود اپنی نظروں سے میں گر چکا ہوں
تِری نظروں میں تب جا کر چڑھا ہوں
مکمّل ہو چکا ہے وہ کسی کا
میں جس کے بن ادھورا رہ گیا ہوں
مزہ آتا ہے اس کا نام سن کر
پتا ہے پھر بھی سب سے پوچھتا ہوں
تِرا انگلی پھرانا یاد کر کے
میں اپنے بال اکثر نوچتا ہوں
مسلسل جنگ خود سے چل رہی ہے
میں اپنے آپ میں اک کربلا ہوں
بلندی کا سفر کرنا ہے مجھ کو
سو تیرے قدموں میں آ کر پڑا ہوں
جہاں میں نفرتوں کی دھوم ہے اور
ابھی تک میں محبّت پر اڑا ہوں
