غزل
ڈاکٹربدرمنیر
کُنجِ حیرت سے چلے دشتِ زیاں تک لائے
کون لا سکتا ہے’ ہم دل کو جہاں تک لائے؟
اک ہنگامہ ہے برپا پسِ دیوارِ بدن
ہے کسے تابِ سخن’ کون زباں تک لائے؟
ٹھیک ہے چشمِ تغافل یہ تیری دیَن سہی
تاب زخموں کی مگر کوئی کہاں تک لائے
آنکھ ویراں تھی کسی دشتِ تپاں کی صورت
ہم اسے سلسۂ آبِ رواں تک لائے
چل نکلتی ہے تو پھر لب پہ بھی آ جاتی ہے
لانے والے کی یہ مرضی ہے جہاں تک لائے
عین ممکن ہے ٹھہر جائے سزا وارِکرم
ہم یہی سوچ کے دل کوئے بتاں تک لائے
تجھ کو جو چاہیے بے خوف و خطر لیتا جا
کون کافر ہے کہ جو دل میں گماں تک لائے
