تمنا کے ادوار
تمنا کا اک دور جلنے کو پہنچا
تو میں اُس پری کے تعاقب میں چلنے لگا
جس کو کالام کے جنگلوں میں
درختوں کی چھاؤں میں دیکھا تھا میں نے
تیز رفتا گاڑیوں کے دھوئیں میں
وقت کی تیز رفتار روشنی میں
دفاتر سے لوٹے ہوؤں میں
کسی اجنبی شہر کے قہوہ خانوں میں
دیکھا تھا میں نے
پری ایک کونے میں دبکی ہوئی
چائے کے بدمزہ پن سے خائف،
آنکھوں پہ عدسہ لگائے
زمان و مکاں سے کہیں بےخبر تھی
دھواں بن رہی تھی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شب نے جب اپنے ماتھے پہ کالک ملی
لوگ جب اپنے اپنے گھروں کو نکلنے لگے
میں نے راوی کنارے پری کو نہاتے ہوئے دیکھنا تھا
مگر اس کو بازار سے چند کتابیں ، ڈائری اور پینسل
پکڑنی تھی جو اس کے زادِ سفر میں لکھی تھی
شہرِ لاہور کی آخری رات کیسے کٹی
میں نہیں جانتا
صبح ہوتے ہی میں جب کنارے کنارے چلا
وہ پری بالکونی میں بالوں کو لٹکا کے
اس کو سکھانے لگی تھی
اس سمے جب نکھرتی سحر نے
تپتے سورج کا ماتھا چھوا
میری آنکھیں لگیں
اور بارہ دری ہی مری خواب گاہ بن گئی
بس کہ خوابوں پہ معمور دنیا تھی
چیختا بھی تو کب میری آواز
درمیانی خلا کا گلا گھونٹ لیتی
میں پری کے تعاقب میں اتنا چلا
کہ مرا خواب بارہ دری پر ہی سویا رہا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اُس نے پلو سے باندھا ہوا پھول
مجھ کو دیا
جھیل کے سبز پانی سے کاسہ بھرا
اور مجھ کو دیا
جھیل ناران کی سب سے اونچے پہاڑوں پہ تھی
ہم گھنے بادلوں پر
کہیں برف کے سل پہ
اپنی کہانی کو لکھتے رہے
جب کہانی پری کو سنانے لگا
وہ دھواں بن گئی
میں پلٹتے ہوئے خواہشوں کا ٹکٹ تک نہیں لے سکا
اس کے پلو سے باندھا ہوا پھول
میری ہتھیلی پہ تارہ بنا
میں پلٹتے ہوئے وقت کی بےاعتنائی پہ برہم ہوا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زمانے کی رنجور خواہش نے جب
مجھ کو دامان کی تپتی مٹی پہ کھینچا
پری کیکروں کے قطاروں کی
چھاؤں میں رقصاں تھی
اور میں شرابور ہو کر سرابوں کے
تختوں پہ لیٹا اسے دیکھتا تھا
کہ چھونا پری کا مرے بس میں تھا ہی نہیں
