غزل
سجدہ گاہوں میں، کہیں جانبِ محراب کھلے
چشمِ دل وا ہوئی ادراک کے ابواب کھلے
زینۂ عرش سے اتری جو سواری شب کی
بامِ عرفان پہ آکر کئی مہتاب کھلے
خود بخود شکوۂ آشفتہ سری جاتا رہا
ان سے منسوب جو ان آنکھوں پہ کچھ خواب کھلے
میں کہ تھا فلسفۂ کن فیکوں میں الجھا
میرے اشکال تہِ عالمِ اسباب کھلے
پارسائی رہِ ادراک میں حائل تھی یہاں
تھوڑا بہکے تو رموزِ رخِ مےناب کھلے
مطمئن تھا کہ میں مامون ہوں اے حسرتِ دل
کچھ قدم دوری پہ منزل تھی کہ احباب کھلے
خاک زادوں پہ ہی اترے ہیں صحیفے دل کے
شاہ زادوں پہ فقط سطوت و داراب کھلے
خلوتِ ذات میں تھا نغمہ سرا خانہ بدوش
بزمِ جاناں میں جو کچھ دیر ثمریاب کھلے
