فارمولا
ہماری سب ریاضت بس ریاضی ہے
ریاضی
ہم ریاضی دان ہیں
اپنا بنایا فارمولا ہیں
ہماری زندگی کے دس کا پورا آٹھواں حصہ تو ہر دم
موت کے ایمن کی ٹھمری گا رہا ہے
یہ اسی بیس کا کلیہ ہے
اسی بیس کا کلیہ
یہ ہم کیا کر رہے ہیں
اک ذرا خود کو ٹٹولو
واقعی جیتے ہیں ہم یا مر رہے ہیں
بہت کم لوگ ہیں
جو مسکرا کر جام صحت
اپنی زندہ ذات کو تجویز کرتے ہیں
پھر اس کو سانس کے شیشے سے ٹکراتے ہیں
پیتے ہیں
بہت کم لوگ ہیں جو زندگی کو زندگی کہتے ہیں
جیتے ہیں
پرندوں کی طرح
چھتنار زندوں کی طرح
ورنہ تو سارے
سانس کے تابوت میں
سہمے ہوئے کلبوت میں
بس زندگی کی فوت جیتے ہیں
یہ عالم
اور ان کے اندھے پیروکار
ہرگز زندگی جیتے نہیں ہیں
موت جیتے ہیں
