ابنِ مریم ! مرے فلسفی !
زندگی قید ہے
گور کی گود میں وہ شفا ہے
جو ماؤں کی گودی سے نکلیں تو
دنیا میں ملتی نہیں
میری چنتا نہ کر
میرے پیروں کو حلقوں سے آزاد ہونے کی ہرگز تمنا نہیں
میں میانِ شبِ تیرگی
رقص کا پا گئی راز , ہوں
رقص جھرنا ہے
جاری ہے ازلوں سے رُکتا نہیں
اس میں زنجیر ہلنا ضروری نہیں
میری چنتا نہ کر
ابنِ مریم !
مسیحا مرے!
تیری بیمار میں
ناتوانی میں ایزد کے آگے جھکی
میرے ماتھے پہ جگنو چمکنے لگے
وہ مسیحائی , بوسہ وہ نوروں بھرا
تیرگی سے اٹی رات میں سوختہ,
میں شکستہ
سسکتی ہوئی
روشنی پا گئی
ابنِ مریم !
تری گندمی
میں ترے بعد اتنا چلی
آبلے مجھ سے تنگ آگئے
میرے پیروں تلے
سبزگوں چادریں بچھ گئی
دودھ کا دودھ الگ ہو گیا
پانیوں کو ہوا کھا گئی
میں شفا پا گئی
