غزل
جہاں سب خواہشوں کو راستہ دکھلا رہے ہیں
وہاں ہم راستوں کو راستہ دکھلا رہے ہیں
ہماری بے گھری حیراں ہے اس کارِ زیاں پر
کہ بے گھر بے گھروں کو راستہ دکھلا رہے ہیں
بہت اڑتے ہیں پھر نیچے اترتے ہیں زمیں پر
پرندے بادلوں کو راستہ دکھلا رہے ہیں
درختوں سے اتر کر اڑنے والے خشک پتے
ہم ایسے سر پھروں کو راستہ دکھلا رہے ہیں
بھلائی کا کوئی مذہب نہیں ہے دو جہاں میں
ستارے منکروں کو راستہ دکھلا رہے ہیں
بہت خوش ہیں سب اپنے آپ کو گمراہ کر کے
خوشی میں دوسروں کو راستہ دکھلا رہے ہیں
