افسانہ : مینو۔۔۔اب یہاں نہیں رہتی / افسانہ نگار: کنول بہزاد

صبحدم چڑیوں کی چہکار ، نرم ہوا کے جھونکے اور سورج کی روپہلی کرنیں اسے ہی تو گدگدانے آتی تھیں ۔ وہ مسکراتے ہوئے ہولے ہولے اپنی نیند سے مندی آنکھیں کھولتی اور پھر بستر سےچھلانگ لگا کر بھاگتی ہوئی باورچی خانے میں کھڑی ماں سے جاکر لپٹ جاتی ۔۔۔
"ماں۔۔۔مینو جاگ گئی ہے ۔۔۔پراٹھا بننے میں کتنی دیر ہے ؟ جلدی کریں نا۔۔۔مجھے سکول وقت پر پہنچنا ہے ۔۔۔ہاں۔۔۔میں بھول ہی گئی کہ آج دو پراٹھے چاہئیں مجھے ۔۔۔وہ پینو ندیدی ہے نا۔۔۔اسے بھی آپ کے ہاتھ کا پراٹھا چاہیے ہوتا ہے۔۔۔اپنا ٹفن وہ دوسری لڑکیوں کو دے دیتی ہے۔۔۔”
” اچھا بابا ۔۔۔تم تیار تو ہو جاؤ ۔۔۔ابھی بن جاتا ہے دوسرا پراٹھا۔۔۔ تمہاری ندیدی پینو کے لیے بھی ۔۔۔”
ماں کی ہنسی اور آواز اس کے کمرے تک ساتھ چلی آتی۔۔۔
ابا گلی میں کھڑے ہو کر سائیکل کی گھنٹی بجاتے تو وہ بستہ،تختی اور ٹفن سنبھالے بھاگ کھڑی ہوتی ۔۔۔اماں کے ہونٹ دعاؤں کا ورد کرتے اور نگاہیں صدقے اتارتیں۔۔۔دروازے سے آدھی باہر لٹک کر اسے گلی کی نکڑ تک دیکھتی رہتیں اور وہ ہاتھ ہلاتی رہتی۔
کیسے حسین دن تھے۔۔۔تتلیوں کے پیچھے بھاگنے کے ،جگنووں کو مٹھی میں قید کرنے کے ،موسموں کو دل کی لے پہ دھرنے کے اور آنکھوں میں انوکھے خواب سجا کے رکھنے کے۔۔۔

"ارے۔۔۔یہ کیا کر رہی ہو مینو۔۔۔؟”
ماں نے اسے کیلنڈر کی تاریخوں پر کراس لگاتے دیکھ کر پوچھا ۔
” پتہ ہے گرمیوں کی چھٹیاں شروع ہونے میں بس اٹھارہ دن باقی ہیں ۔۔۔یہی دیکھ رہی تھی۔۔۔”
مینو نے جواب دیا ۔
” بہت دل کر رہا ہے دادی سے ملنے کو؟”
ماں نے پیار سے پوچھا ۔
"اور نہیں تو کیا ۔۔۔مجھے شیریں اور سرمد سے بھی ملنا ہے ۔۔۔اتنا مزا آتا ہے جب ہم آموں کے باغ میں درختوں سے کیریاں توڑ کے کھاتے ہیں ۔۔۔بوا کے گھر جانے والی پگڈنڈی پر ریس لگاتے ہیں ۔۔۔جھولوں پر لمبے لمبے ہلارے لیتے ہیں اور ہمیشہ زینب کی گڑیا بیاہ کر لاتے ہیں ۔۔۔”
وہ یہ کہہ کر شرارت سے ہنس دی۔

” یہ تو اچھی بات نہیں ہے ۔۔۔زینب تمہاری محبت میں ہر بار اپنی گڑیا کی قربانی دیتی ہے۔۔۔اس بار اس کے لیے کوئی اچھا سا تحفہ لے کر جانا۔۔۔”
ماں نے رسان سے کہا ۔
” ہاں۔۔۔یہ ٹھیک ہے ۔۔۔زینب کو چوڑیاں بہت پسند ہیں ۔۔۔میں ابا سے کہوں گی اس کے لیے ڈھیر ساری رنگ برنگی چوڑیاں لے کر آئیں۔۔۔اس کے لیے کہانیوں کی کتابیں بھی لے سکتی ہوں ۔۔۔مگر وہ سکول نہیں جاتی۔۔۔آپ کہیں نا۔۔۔اس کے گھر والوں سے کہ اسے سکول بھیجیں۔۔۔”
"میں اس بار ضرور بات کروں گی ۔۔۔”
اماں نے یقین دلایا ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

"مینو۔۔۔مینو۔۔۔رک جاؤ ۔۔۔”

"کیوں بھلا ۔۔۔ ہار گئے نا۔۔۔میں نے کہا تھا نا ۔۔۔تم میری طرح تیز نہیں بھاگ سکتے۔۔۔ہار گئے۔۔۔ہار گئے۔۔۔”

” شیریں کی بچی۔۔۔آہستہ جھولا دو۔۔۔مجھے گرانا ہے کیا۔۔۔”
” بوا۔۔۔مجھے اس بار عیدی میں پورے دس روپے چاہییں ۔۔۔ وہ پینو ہر بار مجھے چھیڑتی ہے کہ تمہاری بوا بڑی کنجوس ہیں ۔۔۔اتنی کم عیدی دیتی ہیں ۔۔۔اس بار میں نے اسے جلانا ہے "

” ہائے میلے میں کتنا مزہ آیا اس بار۔۔۔ابا نے ہر وہ چیز مجھے لے کر دی جس جس پر میں نے ہاتھ رکھا…”

” پتہ ہے مجھے پرندوں کی مانند اڑنے کا بہت شوق ہے ۔۔۔اماں ابا کہتے ہیں اگر میں محنت کروں تو ایک دن جہاز اڑا سکوں گی…ہائے تب کتنا مزہ آئے گا نا۔۔۔”

” ددو۔۔۔کیا ہر بارکہانی کے آخر میں لوگ ہنسی خوشی رہنے لگتے ہیں ۔۔۔چاہے کیسی بھی مشکلیں کیوں نہ آئیں ۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آئینے کے اس پار ایک دھندلی سی شبیہہ ، گڈ مڈ ہوتے سائے اور ڈھیر ساری آوازیں ۔۔۔
اس کا دل چاہا۔۔۔وہ پتھر مار کر آئینے کو توڑ دے۔۔۔مگر یہ آئینے تو جگہ جگہ نصب تھے ۔۔۔اس گھر کے مالک کوجانے کیسا خبط تھا آئینوں کا ۔۔۔جس کا اپنا چہرہ سدا ایک دھند کے حصار میں رہا تھا ۔۔۔
پھر آوازیں ۔۔۔ جو وقت کے گنبد میں محفوظ گونجتی رہتی تھیں ۔۔۔ان کا تسلسل بھلا کس پتھر کی ضرب سے ٹوٹ سکتا تھا ۔۔۔

” آدمی جو کہتا ہے۔۔۔آدمی جو سنتا ہے ۔۔۔زندگی بھر وہ صدائیں پیچھا کرتی ہیں ۔۔۔
۔۔۔۔۔۔۔۔۔۔۔”
ایک گیت ہوا کے دوش پہ لہراتا ۔۔۔اس کی سماعتوں سے ٹکرایا ۔۔۔

” یہ پرانے گیت بھی ،پرانے دوستوں سے ہوتے ہیں ۔۔۔جو مدتوں بعد ٹکرا جائیں تو خوشی کے ساتھ ساتھ ۔۔۔آنکھوں میں نمی بھی لے آتے
ہیں۔۔۔”

اس نے ہنستے ہوئے آنکھیں مسل ڈالیں۔۔۔
اسی لمحے اچانک کمرے کی ٹیوب لائٹ آن ہونے سے آنکھیں چندھیا سی گئیں ۔

” یہ اندھیرا کرکے کس کا سوگ منایا جا رہا ہے ۔۔۔ حنان اور میرب کے آنے کا وقت ہو رہا ہے ۔۔۔مجھے بھی بھوک لگی ہے ۔۔۔کھانا لگواو اب۔۔۔”

وہی سدا کا اکھڑا ہوا لہجہ اور خشونت بھری آواز ۔۔۔ جو بس دوسروں کے سامنے ذرا سی لچکدار اور نرم پڑ جایا کرتی تھی ۔
وہ فوراً سے پہلے اٹھ کھڑی ہوئی۔۔۔
” مینو کی بچی۔۔۔یہ تم ہی ہو نا۔۔۔دیکھ لو میں نے اتنے سالوں بعد تمہیں ڈھونڈ لیا ۔۔۔جلدی سے ایڈریس بھیجو۔۔۔میں آج کل پاکستان میں ہوں۔۔۔اور تمہارے ہی شہر میں ۔۔۔صبح آتی ہوں تم سے ملنے۔۔۔”

رات کے پچھلے پہر میسنجر پر ایک پیغام جگمگایا۔۔۔
ہاں یہ پینو ہی تھی۔۔۔اس کی بہت پیاری سہیلی ۔۔۔

” مگر۔۔۔اس نے مجھے پہچانا کیسے۔۔۔ چار سال پہلے جب یونہی سرمد مجھ سے آ ٹکرایا تھا تو کیسی اجنبیت تھی اس کی آنکھوں میں ۔۔۔جیسے مجھے جانتا ہی نہ ہو۔۔۔وجاہت کے ہاتھ پہ ہاتھ مارتا۔۔۔قہقہے لگاتا۔۔۔کس قدر آسودہ اور مطمئن نظر آتا تھا ۔۔۔ان خوابوں کا ہلکا سا عکس بھی اس کے چہرے پہ نہ تھا جو ہم دونوں نے کبھی مل کر دیکھے تھے ۔۔۔”

اس نے فون آف کرکے ایک طرف ڈال دیا ۔۔۔

” مینو۔۔۔یہ تو ہے۔۔۔کتنی کٹھور نکلی نا تو۔۔۔مجھے اپنے گھر کا ایڈریس ہی نہیں بھیجا ۔۔۔وہ تو اتفاق سے تیری ایک میوچل فرینڈ سے پتہ چلا ۔۔۔”
پینو اسے گلے لگائے شکوہ کناں تھی۔۔۔
” وہ۔۔۔میں نے سوچا صبح بھیج دوں گی ۔۔۔مگر پھر مصروفیت میں ۔۔۔”
امینہ نے صفائی پیش کرنے کی ناکام کوشش کی ۔

"چل معاف کیا ۔۔۔بس ہمیشہ سوچتی تھی کبھی مینو سے مل پاؤں گی ۔۔۔اور دیکھ کیسے آج پینو اور مینو پھر ایک ساتھ ہیں ۔”
پینو اپنی ہی رو میں بولے چلی جا رہی تھی اور وہ مسکرانے کی کوشش میں ہونق سی لگ رہی تھی۔

اس نے پینو کی تواضع میں کوئی کمی نہ چھوڑی۔۔۔اس سے باتیں کیں۔۔۔ پرانے قصے بھی دہرائے۔۔۔قہقہے بھی لگائے۔۔۔وجاہت اور بچوں سے بھی ملوایا۔۔۔جاتے سمے ڈھیر سارے تحائف اس کے ہمراہ کر دیے۔۔۔مگر پھر بھی اسے واضح محسوس ہو رہا تھا کہ پینو جان چکی ہے ۔۔۔ مینو اب یہاں نہیں رہتی ۔۔۔وہ غلط پتے پر آگئی تھی ۔

کنول بہزاد