آئی ایم ایف کی سربراہ سے ایک اور رابطہ، پاکستانی وزیراعظم پرامید 

پاکستان کے وزیراعظم شہباز شریف نے منگل کو عالمی مالیاتی فنڈ ’آئی ایم ایف‘ کی مینیجنگ ڈائریکٹر کرسٹالینا جارجیوا سے ٹیلی فون پر رابطہ کر کے توسیعی فنڈ سہولت کے تحت ملنے والے قرض کی قسط سے متعلق معاملات پر بات چیت کی۔ 

ایک سرکاری بیان کے مطابق آئی ایم ایف کی مینیجنگ ڈائریکٹر نے کہا کہ ’پاکستان کی معاشی صورت حال میں بہتری چاہتے ہیں۔‘ 

گذشتہ ہفتے ہی پیرس میں نیو گلوبل فائنانسگ پیکٹ سمٹ میں شرکت کے موقعے پر وزیراعظم شہباز شریف نے کرسٹالینا جارجیوا سے ملاقات میں انہیں یقین دلایا تھا کہ حکومت آئی ایم ایف سے طے شدہ اپنی ذمہ داریوں کو پورا کرنے کے لیے پوری طرح پرعزم ہے۔

وزیراعظم کے دفتر سے جاری بیان کے مطابق ’آئی ایم ایف کی ایم ڈی نے وزیراعظم سے پیرس میں ہونے والی ملاقاتوں کے تناظر میں وزیرخزانہ اور ان کی ٹیم کی آئی ایم ایف پروگرام مکمل کرنے کے حوالے سے کوششوں کا اعتراف کیا۔‘  

بیان میں کہا گیا کہ ’وزیراعظم نے امید ظاہر کی کہ آئی ایم ایف پروگرام کے نکات پر ہم آہنگی آئندہ ایک دو دن میں آئی ایم ایف کے فیصلے کی شکل اختیار کرے گی۔‘

پاکستانی  وزیراعظم نے معاشی صورت حال کی بہتری کے اہداف مشترکہ کوششوں سے حاصل کرنے کے عزم کا اعادہ کیا۔  

پاکستان اور آئی ایم ایف کے درمیان 2019 میں طے پانے والے 6.5 ارب ڈالر کے بیل آؤٹ پیکیج کے تحت 1.1 ارب ڈالر کی قسط کے اجرا پر معاہدہ گذشتہ نومبر سے تاخیر کا شکار ہے۔

پاکستان کے لیے آئی ایم ایف کا پروگرام 30 جون کو 2023 کو ختم ہونے جا رہا ہے۔

پاکستان کو گذشتہ سال نومبر میں  1.1 ارب ڈالر قرض کی قسط ملنے کی امید تھی لیکن آئی ایم ایف نے مزید ادائیگی سے قبل کئی شرائط پر اصرار کیا۔

پاکستان کے پاس 6.5 ارب ڈالر کی توسیعی فنڈ سہولت (ای ایف ایف) کے اختتام سے پہلے آئی ایم ایف بورڈ کے صرف ایک آخری جائزے کا وقت ہے۔

رواں ماہ پاکستان نے آئندہ مالی سال کا بجٹ پیش کیا تھا لیکن آئی ایم ایف نے حکومت کی جانب سے پیش کیے گئے وفاقی بجٹ پر عدم اطمینان کا اظہار کرتے ہوئے کہا تھا کہ پاکستان سے توقع کی جا رہی تھی کہ وہ ایسا بجٹ پیش کرے گا جو آئی ایم ایف کے پروگرام سے ہم آہنگ ہو۔