ہوائے نادید تو کہاں ہے؟
سو دکھ ہماری رگوں میں پیوست ہو گئے ہیں
کہاں جہاں زاد کو پکاریں ؟
کہاں کے کوزے ؟
کہاں تغارے ؟
کہاں کی مٹی ؟
کہاں کا سونا ؟
ہنروروں کے ہیں ہاتھ خالی
مہیب ملبہ بنے ہوئے ہیں
سنہری آنکھوں کے خواب سارے
عذاب میں کیوں بدل گئے ہیں ؟
ادھوری سانسیں ہیں
نرخرے میں پھنسی ہوئی ہیں
کیا بہہ گئے ہیں یہ نیر آنکھوں کے روزنوں سے ؟
اندھیر کیوں ہے ؟
چلو یہ مانا
ہمیں گناہوں کے استعارے
رزیل ٹھہرے
حقیر ٹھہرے
مگر یہ بچے
یہ پھول چہرہ حسین بچے
فرشتہ صورت
انہیں سزائیں
دودھ برتن کے منہ چڑائیں
کرم کی بارش نہیں ہوئی ہے
بھوری چڑیا کا گھونسلہ تھا
کہاں گیا وہ ؟
درخت سائے کی دشمنی میں
یہ دھوپ سر پر تنی ہوئی ہے
شب کے شوریدہ سر خدایا !!
تو دیکھتا ہے ؟
سنہرے موسم کی باگ تھامے
کوئی ہوا کا حسین جھونکا
کوئی نہیں ہے ۔۔۔۔۔
نہیں۔۔۔۔ نہیں۔۔۔۔
یاں۔۔۔ کوئی نہیں ہے
خدایا !!
تیرا کرم ۔۔۔۔۔۔۔۔۔ ؟؟
