غزل
تھی آزمائشوں کی بھی اک حد ہزار شکر
ہم پر کوئی نہ فرق پڑا، صد ہزار شکر
آدھا تو سایا جائے گا ہمسائے کی طرف
اپنے شجر کا اتنا تو ہے قد ہزار شکر
آنکھوں سے ایک خواب کی رخصت ہزار حیف
ڈھلتے پہر میں شعر کی آمد ہزار شکر
ہم بھی کسی سے اُس کے سِوا مانگتے نہیں
ہوتی نہیں ہے اپنی دعا رد ہزار شکر
ہم خاک بخت ہیں تو یہی ہے ہمارا تخت
ہم کو نہیں ہے خواہشِ مسند ہزار شکر
کیا کیا گرہیں نہ کھول دیں اُس کی نگاہ نے
میں کیا ہوں اور کیا مرا مقصد ! ہزار شکر !
ہر شب چراغ ِ یاد کا ہوتا ہے اہتمام
ویراں نہیں ہے دل کا یہ معبد ہزار شکر
مقبول ہو گئے مرے اشک ِ شب ِ فراق
آنے لگی ہے شعر کی ابجد ہزار شکر
