نوزائیدہ نظم کا المیہ
راضیہ!!
ابھی اک نظم لکھی ہے
بہت تازہ
مہکتی کورے برتن سی
عجب سرشار کرتی نظم ہے
جیسے
قلعہ کوئی فتح کر لیں
کہیں طغیانیوں کو چیر کر ساحل پہ اتریں
اور کسی انجان بستی کی خبر لائیں یا اپنی پہلی محبوبہ کا بوسہ
اولیں امرت بھرا
سوچو !
ذرا سی دیر ہو جائے
تو باسی ذائقہ دل سے اترتا
رس نہیں دیتا
اسے تکمیل کے حتمی مراحل تک لے آنا ہے
مجھے جلدی سنانا ہے
مگر اب رات کا پچھلا پہر ہے
نیند کی وادی میں گم ہے ساری دنیا
اور ہم نظموں کی دھن میں
جاگتے ،خاکے بناتے ، توڑتے،
لکھتے، مٹاتے۔۔۔۔۔۔۔۔۔۔۔۔۔۔۔۔۔
آئنیے کے روبرو ہیں
خود کلامی میں مگن
نیند!!!
اے ظالم !!!
کہاں ہے تو !!!
ہماری عمر کی زنبیل میں بس تو نہیں ہے
تو نے کھائی ہے ہماری آدھی عمر
اور آدھی نظم نے ۔۔۔۔۔۔۔۔۔۔۔۔۔۔۔۔۔۔۔۔۔۔۔
(رات کی ناگن تو ڈستی ہی رہے گی)
کیا سنو گی تم ؟
مری نوزائیدہ
جو خواب اور بےخواب ہوتی نیند کے گالوں
اندھیرے میں مسلسل روشنی کو ڈھونڈتی
چندھیائی آنکھوں
بھوک ۔۔۔۔۔ بیماری
جدائی ۔۔۔۔ نارسائی
سنگ زن پچھلی محبت
وحشتوں ۔۔۔
لاحاصلی ۔۔۔
ٹوٹے ارادوں ۔۔۔۔
ذات کی تکمیل کے خالی کنستر کی صداوں
خواہشوں کے ریگزاروں میں سلگتے تن بدن
پیاسی۔۔۔۔۔۔۔ ترستی آرزوؤں
موت کے ازلی معموں
گوتمی نروان کی ٹہنی پہ جھولا جھولتے
وجدان پر
وقت اور لاوقت کی نادید لہروں
بھاگتے پاگل سمے کی دھار پر
تلوار پر
جو سر پہ لٹکی ہے ۔۔۔۔
نہیں ۔۔۔کوئی نہیں سنتا
فقط ۔۔۔۔۔۔۔ اک تم
سنو گی !!
