چندا
کھڑکی کِس نادان نے کھولی؟
دیکھو موسم بدل رہا ہے
جاڑا اِدھر کو سِرک رہا ہے
دیکھو چندا پیاری لڑکی!!
ہلکی ہلکی سَرد ہوا میں
سب کچھ اچھا لگ جاتا ہے
لیکن شِدت بڑھ جائے گی
تو کیسے تُم بچ پاو گی!!
سرد ہوا سے لَڑ پاو گی؟؟
سرد تَھپیڑے کِھڑکی روکے آ بیٹھیں گے
پھر کیسے تم بَچ پاو گی
پیاری چندا۔۔۔۔۔
کھڑکی سے کچھ ہَٹ کر بیٹھو
آتے جاتے موسم دیکھو
لوگ گزرتے آتے جاتے دُور سے دیکھو
پاس نہ جاو
کھڑکی ٹھنڈک اوڑھ چُکی ہے
دَر بند کر دو کوئی نہیں اَب آنے والا
اِس یخ موسم میں تو پیاری
سب اپنے دَر بند رکھتے ہیں
چندا کا دل کَٹ جاتا ہے۔۔۔۔۔
جیسے باہر ٹھنڈی ہوا کے سِینگ اُگے ہوں
سب اُس سے بَچتے پِھرتے ہوں
چندا نے دَر کھول دیا ہے
ٹھنڈی ہوا کا کوئی نہیں ہے
سب دَر بند ہیں۔۔۔۔۔۔
کہاں کِسی سے لِپٹ سکے گی؟؟
چندا نے دَر کھول دیا ہے
باہر آ کر سرد ہوا میں جُھوم رہی ہے
تَنہا رَقص میں ڈُوب چکی ہے
مَست ہوئی ہے ہوا سے مل کر
سرد ہوا نے پیار سے چندا کو تَھاما ہے
ساتھ دِیا ہے پیار کیا ہے۔۔۔۔۔۔
سرد ہوا اور چندا مِل کر
گھوم رہی ہیں قَریہ قَریہ
چندا خوش ہے سرد ہوا سَنگ
سرد ہوا بھی لہک رہی ہے
کوئی نہیں ہے بِیچ میں اِن کے
لیکن وہ گھوڑے کی ٹاپیں گونج رہی ہیں
چندا اُدھر کو گُھوم گئی ہے
سرد ہوائیں چیخ رہی ہیں
"کوئی نہیں ہے واپس پلٹو”
چندا کا دل جان گیا ہے
وہ آئیں گے۔۔۔۔۔
پیاری چندا اِک ٹُک چُپ ہے
دیکھ رہی ہے۔۔۔۔
لیکن چندا برف کی بَن کے
قَطرہ قَطرہ پِگھل رہی ہے
دیکھ رہی ہے۔۔۔۔۔۔
پِگھل رہی ہے۔۔۔۔۔
