غزل
اُٹھا جو راز سے پردہ تو لوگ رونے لگے
سمجھ میں آ گئی دنیا تو لوگ رونے لگے
ہمارے رونے پہ ہنستے تھے لوگ جی بھر کر
کسی نے ہم کو ہنسایا تو لوگ رونے لگے
میں گاؤں لوٹا تو اس کے مکاں پہ تالا تھا
جب اس کے بارے میں پوچھا تو لوگ رونے لگے
کوئی بھی خالی نہ لوٹا تھا جس کے در سے کبھی
جب اسکا حجرہ کھنگالا تو لوگ رونے لگے
بجھا کے بیٹھے تھے سورج کو اپنے ہاتھوں سے
پھر آیا گھور اندھیرا تو لوگ رونے لگے
کسی کو چھوڑ دے دنیا تو لوگ ہنستے ہیں
کسی نے چھوڑ دی دنیا تو لوگ رونے لگے
