پڑتال
سخن زاد
میرے جنم کو
بہت دیر تک التوا میں نہ رکھو
تواتر کے دھاگوں سے الجھی ہوئی بےقراری
ازل اور ابد کے سروں پر لٹکتے ہوئے فیصلے
جو کتابوں صحیفوں میں مذکور ہیں
واہمہ ہیں فقط واہمہ
ان سے نکلو
مجھے بھی نکالو
میانِ من و تو
مناسب یہی ہے کہ اب کے
مجھے تم کسی بیل بوٹے کی صورت جنم دو
وہی بیل بوٹا زمیں جس کو سینچے
ہوا اور بارش سے جس کی نمو ہو
پرندے جسے دور دیسوں کے قصے سنائیں
یہ بیل اور بوٹا جو پتوں پھلوں اور پھولوں کے رستے
فقط اپنے ہونے کی کھیتی اٹھائے
جسے اپنی نیندیں کہیں
رہن رکھنے کی نوبت نہ آئے
سخن زاد مجھ کو عدم کی اسیری سے باہر نکالو
بہت دیر تک التوا میں نہ رکھو
مجھے اب تعطل کی وحشت روی سے گھٹن ہو رہی ہے
