آئی سی سی ورلڈ کپ میں بنگلہ دیش نے ہفتے کو اپنی مہم کا آغاز افغانستان کو چھ وکٹوں سے شکست دے کر کیا۔
دھرم شالہ میں کھیلے گئے میچ میں افغانستان کی ٹیم پہلے کھیلتے ہوئے مقررہ 50 اوورز میں 156 رنز بنا کر آؤٹ ہو گئی۔
افغان اوپنرز نے ٹیم کو 47 رنز کا آغاز فراہم کیا ابراہیم زدران 22 رنز بنا کر آؤٹ گئے جب کہ رحمان اللہ گرباز 47 رنز بنا کر پویلین لوٹ گئے۔
رحمت شاہ 18، کپتان حشمت اللہ شاہدی 18، نجیب اللہ زدران پانچ، محمد نبی چھ رنز بنا کر وکٹ گنوا بیٹھے۔ عظمت اللہ عمرزئی نے 22 رنز بنائے۔ راشد خان نو اور مجیب الرحمان ایک رن ہی بنا سکے۔ نوین الحق اور فضل فاروقی کے حصے میں ایک بھی رن نہ آیا۔
اس سیکشن میں متعلقہ حوالہ پوائنٹس شامل ہیں (Related Nodes field)
بنگلہ دیش کے آف سپنر مہدی حسن میراز نے 25 رنز دے کر تین وکٹیں لیں۔
بنگلہ دیشی کپتان شکیب الحسن نے بھی افغانستان کو مزید نقصان پہنچایا۔ بائیں ہاتھ سے کھیلنے والے سپنر نے 30 رنز دے کر تین وکٹیں حاصل کیں۔ ان کی جانب سے بولنگ میں تبدیلیوں سے وکٹیں حاصل ہوئیں۔
بعد ازاں بیٹنگ کرتے ہوئے دو بار کیچ ڈراپ ہو کر مہدی حسن میراز نے 57 رنز بنائے۔ نجم الحسین شانتو 59 رنز بناکر ناٹ آؤٹ رہے۔ بنگلہ دیش نے 15 اوورز باقی تھے کہ مطلوبہ ہدف حاصل کر لیا۔
عمدہ بولنگ اور بیٹنگ کرنے پر مراز کو مین آف دی میچ کا ایوارڈ دیا گیا۔ پریزنٹیشن تقریب میں ان کا کہنا تھا کہ ’یہ میرے لیے عظیم لمحہ ہے۔ بولنگ کے آغاز میں، میں محتاط تھا لیکن کپتان (شکیب) نے مجھ سے کہا کہ درست جگہوں پر بولنگ کروں اور اور مجھے مستقل مزاجی سے کام لینے کا کہا۔ اس سے مجھے اعتماد ملا لہٰذا اس کا سہرا کپتان کے سر ہے۔‘
