نعت (صلی اللہ علیہ وآلہ وسلم)
ماوراے مقدر نہیں جائیں گے
ہم تریسٹھ سے اوپر نہیں جائیں گے
اشک لے جائیں گے اس گلی میں تمھیں
اس گلی تک سمندر نہیں جائیں گے
یہ اکھڑتی ہوئی سانس اپنی جگہ
ہم بلا اذن اندر نہیں جائیں گے
ٹوٹے پھوٹے ہوئے جائیں گے ان کی سمت
اپنے زخموں کو سی کر نہیں جائیں گے
وہ اگر دیکھ بھی لیں ہماری طرف
کیا ہمارے گھڑے بھر نہیں جائیں گے؟
عمر بھر دل کی حد تک رہیں گے بلال
ہم مدینے سے باہر نہیں جائیں گے
