گجرات ٹائٹنز کے خلاف میچ میں ایم ایس دھونی کے شاندار کیچ پر سریش رائنا بھی حیران رہ گئے اور انھیں ٹائیگر کا خطاب دے ڈالا۔
آئی پی ایل میں چنئی سپر کنگ اور گجرات ٹائٹنز کے درمیان ہونے والے مقابلے میں اننگز کے 8 ویں اوور میں دھونی نے اسٹمپ کے پیچھے اپنی پرانی فٹنس کا مظاہرہ کرتے ہوئے ایک سنسنی خیز کیچ پکڑا جس نے ان کے سابق ساتھی ساتھی سریش رینا کو ورطہ حیرت میں ڈال دیا۔
چنئی سپر کنگز اور گجرات ٹائٹنز کے درمیان مقابلہ کافی دلچسپ مرحلے میں تھا۔ جی ٹی کے آل راؤنڈر وجے شنکر نے 12 رنز پر بیٹنگ کرتے ہوئے ڈیرل مچل کی گیند پر ڈرائیو کرنے کی کوشش کی۔
گیند نے باہر کا کنارہ لے لیا اور اسی وقت دھونی نے کیچ پکڑنے کے لیے فوری برق رفتاری کا مظاہرہ کیا اور وکٹ کے پیچھے گیند کو تھام لی جس نے نہ صرف گراؤنڈ میں موجود شائقین بلکہ کمنٹیٹرز کو بھی دنگ کردیا۔
رائنا جنھوں نے اپنے کیریئر کے دوران دھونی کے ساتھ کئی یادگار لمحات شیئر کی ہیں وہ اس کیچ پر اپنے جوش پر قابو نہیں رکھ سکے۔
اپنے آفیشل انسٹاگرام اکاؤنٹ پر انھوں نے اس کیچ کا کلپ شیئر کیا اور ساتھ میں لکھا، ’یہ بات یاد رکھیں سر ٹائیگر ابھی زندہ ہے، بھائی ہمیشہ مضبوط رہیں اور آس پاس کے ہر ایک کو متاثر کرتے رہیں۔‘
اس سے قبل رائل چیلنجرز بنگلورو کے خلاف پہلے میچ میں، دھونی نے اسٹمپ کے پیچھے ایک اور کمال دکھاتے ہوئے شاندار رن آؤٹ کیا تھا جس نے مداحوں کو دھونی کے ابتدائی دنوں کی یاد دلا دی تھی۔
