سری لنکا کے وزیراعظم سرکاری دورے پر چین پہنچ گئے ہیں، اپنے دورے کے دوران وہ چینی صدر شی جن پنگ سے ملاقات کریں گے اور توقع کی جارہی ہے کہ وہ کولمبو کے اپنے سب سے بڑے بیرون ملک قرض دہندہ سے قرضوں کی تنظیم نو پر بھی گفتگو کریں گے۔
بین الاقوامی خبر رساں ادارے کی رپورٹ کے مطابق امکان ظاہر کیا جارہا ہے کہ سری لنکن وزیراعظم اپنے سب سے بڑے بیرون ملک قرض دہندہ سے قرضوں کی تنظیم نو پر بات کریں گے۔
سرکاری نشریاتی ادارے سی سی ٹی وی کی فوٹیج میں دیکھا جاسکتا ہے کہ چینی حکام کی جانب سے بیجنگ کے مضافات میں ایک ہوائی اڈے پر گوناوردینا کا ریڈ کارپٹ استقبال کیا گیا۔
چین کی وزارت خارجہ کا اپنے بیان میں کہنا تھا کہ شی اور گوناوردینا چین سری لنکا کی روایتی دوستی کو جاری رکھنے کے بارے میں تبادلہ خیال کریں گے۔
گزشتہ برس سری لنکا نے بین الاقوامی مالیاتی فنڈ آئی ایم ایف سے 2.9 بلین ڈالر کا بیل آؤٹ حاصل کیا تھا۔ یہ مشروط قرض سری لنکا کے غیر ملکی قرض دہندگان کے لیے اطمینان کا باعث ہے۔
آئی ایم ایف کا گزشتہ ہفتے کہنا تھا کہ اس نے کولمبو کے ساتھ ایک سٹاف لیول معاہدہ کیا ہے تاکہ 337 ملین ڈالر کی ادائیگی کا راستہ ہموار کیا جا سکے، جو کہ چار سالہ بیل آؤٹ کی تیسری قسط ہے۔
واضح رہے کہ سری لنکا کے برسوں سے جاری اقتصادی بحران کے دوران بیجنگ اور کولمبو کے درمیان تعلقات پر نظر رکھی جارہی ہے۔