برطانوی شہزادہ ولیم نے اپنی اہلیہ کیٹ مڈلٹن کی صحت سے متعلق لب کشائی کی ہے۔
بین الاقوامی خبر رساں ادارے کی رپورٹ کے مطابق برطانوی شہزادہ ولیم کی اہلیہ کیٹ مڈلٹن کینسر سے بچاؤ کی کیموتھراپی کے عمل سے گزر رہی ہیں۔
شہزادہ ولیم سے برطانیہ میں اسپتال کے دورے کے موقع پر کیٹ مڈلٹن کی صحت سے متعلق سوال کیا گیا جس پر اُن کا کہنا تھا کہ وہ ٹھیک ہیں، شکریہ۔
یاد رہے کہ کیٹ مڈلٹن کا مارچ میں دیئے گئے بیان میں کہنا تھا کہ اس سال کی ابتداء میں پیٹ کی سرجری کے بعد انہیں کینسر کی تشخیص ہوئی تھی جس کا وہ علاج کرا رہی ہیں۔
دوسری جانب برطانوی شہزادہ ولیم کا کہنا ہے کہ 7 اکتوبر کے بعد سے مشرق وسطیٰ میں جاری تنازع کی خوفناک انسانی قیمت پر شدید فکرمند ہوں، اس تنازع میں بہت زیادہ جانی نقصان ہوا ہے۔
برطانوی شہزادے ولیم کا کہنا تھا کہ میں بھی سب کی طرح اس جنگ کا جلد از جلد خاتمہ چاہتا ہوں، غزہ میں اس وقت انسانی امداد کی شدید ضرورت ہے، یہ انتہائی اہم ہے کہ غزہ میں امداد پہنچے اور یرغمالیوں کو بھی رہائی ملے۔
