پاکستان کے پہلے سیٹلائٹ مشن ’آئی کیوب قمر‘نے کامیابی کیساتھ چاند کے مدار سے پہلی تصویر بھیج دی۔
اے آر وائی نیوز کے مطابق پاکستان کے پہلے سیٹلائٹ مشن ’آئی کیوب قمر‘نے کامیابی کیساتھ چاند کے مدار سے پہلی تصویر بھیج دی، آئی کیوب قمر نے چاند کے گرد تین چکر لگائے۔
ترجمان سپارکو کے مطابق آئی کیوب قمر نے کامیابی کیساتھ چاند کے مدار سے پہلی تصویر لی، ابتد ائی ٹیسٹ کے بعد آئی کیوب قمر سے لی گئی پہلی تصویر جاری کی گئی ہے، آئی کیوب قمر نے پہلی تصویر سورج کی حاصل کی ہے۔
سپارکو کے مطابق چاند کے مدار میں داخل ہونے والا پہلا پاکستانی سٹیلائٹ آئی کیوب قمر 12 گھنٹے میں چاند کا مکمل چکر لگائے گا، آئی کیوب قمر چاند کے مدار میں چاند کی سطح سے 200 کلو میٹر کے فاصلے سے منظر کشی کرے گا۔
ترجمان سپارکو نے بتایا کہ آئی کیوب قمر کے سگنلز 3 لاکھ 60 ہزار سے لیکر 4 لاکھ کلو میٹر کا فاصلہ طے کر کے زمین پر موصول کئے جائیں گے۔
ترجمان اسپارکو نے مزید بتایا کہ سیٹلائٹ آئی کیوب قمر میں دو کیمرے نصب ہیں جو چاند کی تصاویر بنارہے ہیں، آئی کیوب قمر 8 مئی کو چاند کے مدار میں داخل ہوا تھا۔
یاد رہے کہ آئی کیوب قمرکوچینی مشن چینگ6 کے ساتھ 3 مئی کو ہینان اسپیس لانچ سائٹ سے خلا میں بھیجا گیا تھا، پاکستان کا سیٹلائٹ مشن 3 سے 6 ماہ تک چاند کے اطراف چکر لگائے گا۔
