سیکیورٹی فورسز کی جانب سے بونیر میں انٹیلی جنس بیسڈ آپریشن کیا گیا، اس دوران فائرنگ کے تبادلے میں مطلوب دہشت گرد سلیم عرف ربانی مارا گیا۔
آئی ایس پی آر کے مطابق فائرنگ کے تبادلے میں 2 دہشت گرد زخمی بھی ہوئے ہیں، جن سے بڑی تعداد میں ہتھیار برآمد کرلئے گئے ہیں۔
آئی ایس پی آر کا کہنا ہے کہ ہلاک دہشت گرد سلیم عرف ربانی پر 50 لاکھ کا انعام تھا، ہلاک دہشت گر د سیکیورٹی فورسز اور بیگناہ شہریوں پر حملے میں ملوث تھا۔
آئی ایس پی آرکے مطابق بونیر میں انٹیلی جنس بیسڈآپریشن کے دوران لانس حوالدار مدثر محمود اور لانس نائیک حسیب جاوید بہادری سے لڑتے ہوئے شہید ہوگئے۔
اس سے قبل جنوبی وزیرستان میں سکیورٹی فورسز سے فائرنگ کے تبادلے میں دو دہشتگرد ہلاک ہوگئے جن سے ہتھیار اور دھماکا خیز مواد برآمد کیا گیا۔
پاک فوج کے شعبہ تعلقات عامہ (آئی ایس پی آر) کے مطابق دونوں دہشتگردوں کو انٹیلی جنس بیسڈ آپریشن کے دوران ہلاک کیا گیا جو متعدد دہشتگردی کی کارروائیوں میں ملوث تھے۔
آئی ایس پی آر کے مطابق ہلاک دہشتگردوں سے ہتھیار اور دھماکا خیز مواد برآمد ہوا، علاقے میں دیگر دہشتگردوں کے خاتمے کیلیے سینٹائزیشن آپریشن جاری ہے۔
