بہاولپور کے علاقے مسافر خانہ میں بیوی سے ناراضگی پر سنگدل باپ نے اپنی دو معصوم بیٹیوں کو موت کی نیند سلادیا۔
اے آر وائی نیوز کے مطابق پولیس کا کہنا ہے کہ ملزم سجاد نے اپنی 5 سالہ اور 3 سالہ بیٹی کوقتل کرکے پولیس کو گرفتاری دے دی۔
پولیس کے مطابق پولیس بیوی کی طرف سے عدالتی آرڈر پربچیاں برآمد کرنے گئی تھی، ملزم نے پولیس کو گھر کے باہر کھڑا کیا اور اپنی بیٹیوں کو قتل کردیا۔
ملزم کی بیوی میکے تھی، بچیوں کی حوالگی کیلئے عدالت سے رجوع کیا تھا، پولیس نے ملزم کو حراست میں لے کر مزید کارروائی کا آغاز کردیا ہے۔
دوسری جانب پنجاب کے شہر شیخوپورہ میں کم عمری کی شادی کروانے کی کوشش کا ایک اور واقعہ پیش آیا جسے پولیس کی بروقت کارروائی نے ناکام بنا دیا۔
ڈی پی او شیخوپورہ بلال ظفر شیخ نے بتایا کہ کوٹ نذیر میں کمسن بچوں کی شادی کی کوشش ناکام بنائی جہاں 13 سالہ لڑکے اور 5 سالہ بچی کی شادی کروائی جا رہی تھی۔
بلال ظفر شیخ نے بتایا کہ 5 سالہ دلہن کو اس کا والد گود میں اٹھا کر بھاگ گیا جبکہ دولہا کے ایک رشتہ دار کو گرفتار کر کے مقدمہ درج کر لیا۔
واضح رہے کہ پاکستان میں چائلڈ میرج ایکٹ موجود تو ہے لیکن اس پر مؤثر عمل درآمد نہ ہونے کے باعث ملک میں آئے روز کمسن بچیوں کی بوڑھوں سے زبردستی کی شادی کے واقعات سامنے آتے رہتے ہیں۔
