لاہور : پنجاب کے شہر لاہور میں نامعلوم موٹر سائیکل سوار مسلح افراد کی فائرنگ سے پولیس افسر شہید ہوگیا، واقعہ مصری شاہ کے علاقے میں پیش آیا۔
تفصیلات کے مطابق لاہور کے علاقے مصری شاہ میں دہشت گردی کا واقعہ پیش آیا ہے جہاں نامعلوم مسلح ملزمان نے سب انسپکٹر ارشد کو فائرنگ کا نشانہ بنایا۔
پولیس حکام کے مطابق سب انسپکٹر ارشد اپنی ڈیوٹی ختم کرکے گھر واپس جارہا تھا، راستے میں نامعلوم ملزمان نے اس پر اندھا دھند فائرنگ کردی، سب انسپکٹر ارشد کو گردن، چھاتی اور پیٹ میں تین گولیاں لگیں۔
پولیس کے مطابق سب انسپکٹر ارشد نے زخموں کی تاب نہ لاتے ہوئے موقع پر ہی جان دے دی، شہید سب انسپکٹر ارشد لاہور کے باغبان پورہ انویسٹی گیشن ونگ میں تعینات تھا۔
سب انسپکٹر پر فائرنگ کی سی سی ٹی وی فوٹیج منظر عام پر آگئی، فوٹیج میں موٹر سائیکل سوار ملزمان کو ارشد پر فائرنگ کرتے دیکھا جا سکتا ہے۔
علاوہ ازیں تھانہ کاہنہ کے علاقے گجومتہ میں گھات لگائے ملزمان نے فائرنگ کرکے دو افراد کو قتل کردیا۔ ایس پی ماڈل ٹاؤن احمد زنیر چیمہ کی ایس ڈی پی او کاہنہ کو فوری ملزمان کی گرفتاری کی ہدایت کی ہے۔
