سرجری کے بعد برطانوی شہزادی کیٹ مڈلٹن نے دوبارہ سے اپنے فرائض کی انجام دہی کی طرف لوٹنا شروع کردیا۔
بین الاقوامی خبر رساں ادارے کی رپورٹ کے مطابق کیٹ مڈلٹن نے شاہی محل سے ہی ’چائلڈ کیرئیر پروجیکٹ‘ سے منسلک اپنے فرائض انجام دینا شروع کردیئے ہیں۔
میڈیا رپورٹس میں انکشاف ہوا ہے کہ برطانوی شہزادی کی طبیعت پہلے کے مقابلے میں اب کافی بہتری کی جانب گامزن ہے، جبکہ کیٹ مڈلٹن گھر میں رہ کر صحت یابی کی طرف لوٹتے ہوئے بچوں کی ابتدائی نشونما سے متعلق اپنے مختلف منصوبوں پر کام میں مصروف ہیں۔
کینسنگٹن پیلس کے قریبی ذرائع کا اس حوالے سے کہنا ہے کہ برطانوی شہزادی (Royal Foundation Centre for Early Childhood) کی سربراہی میں کئے جانے والے ایک اہم مطالعے کی پیشرفت کی نگرانی میں مصروف ہیں۔
اس تحقیق کے مثبت نتائج سامنے آئے ہیں جو بہت جلد عوام کے لیے پیش کر دیئے جائیں گے، اس مطالعے کا مقصد ایک ایسا آلہٰ تیار کرنا ہے جو بچوں میں سماجی اور جذباتی نشوونما کا پتہ لگانے کے قابل ہو۔
کینسنگٹن پیلس کے ترجمان کا تصدیق کرتے ہوئے کہنا تھا کہ برطانوی شہزادی اس تحقیق کے پورے عمل کے دوران مسلسل محقیقن سے رابطے میں رہیں اور اپ ڈیٹ حاصل کرتی رہی ہیں، جس سے بچوں کی بہبود کے لئے ان کی لگن کا اظہار ہوتا ہے۔
واضح رہے کہ برطانوی شہزادی کیٹ مڈلٹن کی سرجری کے بعد شاہی محل کی جانب سے اس حوالے سے اعلان سامنے آیا تھا کہ شہزادی کی سرجری کامیابی سے ہمکنار ہوگئی ہے۔
