کراچی کے علاقے ڈیفنس خیابان بخاری میں نئی تعمیر شدہ سڑک پر ڈرفٹنگ میں ملوث ڈاکٹر کو پولیس نے گرفتار کرلیا۔
اے آر وائی نیوز کے مطابق کنٹونمنٹ بورڈ کلفٹن کی جانب سے ایکشن لینے پر پولیس نے کارروائی کرتے ہوئے ایک نوجوان کو گرفتار کرلیا جبکہ دوسرے شخص کی تلاش جاری ہے۔
ڈی آئی جی ساؤتھ اسد رضا کا کہنا ہے کہ ڈرفٹنگ میں ملوث ڈاکٹر کو شامل تفتیش کرلیا گیا ہے۔
ڈی آئی جی کا کہنا ہے کہ دوسرے شخص کو جلد گرفتار کرلیا جائے گا اور کسی کو بھی جدید طرز پر بنائی گئی سڑکوں کو نقصان پہنچانے نہیں دیں گے۔
انہوں نے کہا کہ ایسے عناصر کے خلاف کارروائی عمل میں لائی جائے گی۔
دوسری جانب کنٹونمنٹ حکام نے بتایا کہ خیابان بخاری کی نئی تعمیر شدہ سڑک کی مرمت کا خرچہ کار سوار برداشت کرے گا۔
واضح رہے کہ اس روڈ کا افتتاح ہوئے ابھی کچھ ہی روز گزرے تھےکہ منچلے اپنی گاڑیوں میں یہاں پہنچے اور ڈرفٹنگ اور روڈ پر ڈونٹس بنانےکے کرتب دکھانا شروع کردیے جس سے سڑک برباد ہوگئی۔
ڈرفٹنگ کی ویڈیوز سوشل میڈیا پر وائرل ہونے کے بعد کنٹونمنٹ بورڈ کلفٹن کی جانب سے مقدمہ درج کرایا گیا تھا۔
