اسلام آباد : اپوزیشن لیڈر عمر ایوب کا کہنا ہے کہ جیل سپرنٹنڈنٹ اسدوڑائچ ایک کرپٹ آدمی ہیں، ان کے خلاف توہین عدالت کی کارروائی شروع کراؤں گا۔
تفصیلات کے مطابق قومی اسمبلی میں اپوزیشن لیڈر عمر ایوب نے سماجی رابطے کی ویب سائٹ ایکس پر اپنے بیان میں کہا کہ عدالتی حکم کے باوجود مجھے بانی پی ٹی آئی سے ملنے نہیں دی دیا گیا، بانی پی ٹی آئی نے جیل عملے سے بار بار کہا کہ وہ مجھ سے ملنا چاہتے ہیں۔
عمرایوب کا کہنا تھا کہ اڈیالہ جیل کے گیٹ پر 5 گھنٹے کھڑا رہا لیکن عملہ بہانے بناتا رہا،جیل سپرنٹنڈنٹ بھی چھپ گئے،ساتویں بارملاقات نہیں کرنے دی گئی، جیل سپرنٹنڈنٹ عدالتی احکامات نہ مان کر کھلم کھلا توہین عدالت کررہےہیں۔
اپوزیشن لیڈر نے مزید کہا کہ جیل سپرنٹنڈنٹ اسد وڑائچ ایک کرپٹ آدمی ہیں ، جیل سپرنٹنڈنٹ کو قومی اسمبلی کی استحقاق کمیٹی کے سامنے پیش کروں گا اور ان کے خلاف توہین عدالت کی کارروائی شروع کراؤں گا۔
