غزہ: مقبوضہ فلسطین کے محصور علاقے غزہ میں 7 اکتوبر 2023 سے جاری اسرائیلی جارحیت کے نتیجے میں شہید ہونے والوں کی تعداد 34 ہزار سے تجاوز کر گئی۔
الجزیرہ اور فلسطینی وزارت صحت کے مطابق 7 اکتوبر سے غزہ پر اسرائیلی حملوں میں کم از کم 34,012 فلسطینی شہید اور 76,833 زخمی ہو چکے ہیں۔
غزہ کی وزارت صحت کے مطابق گزشتہ 24 گھنٹوں کے دوران اسرائیلی حملوں کی زد میں آ کر 42 افراد شہید اور 63 زخمی ہوئے، الجزیرہ کے نمائندے کے مطابق اسرائیلی فورسز نے مقبوضہ مغربی کنارے کے تلکرم میں نور شمس پناہ گزین کیمپ پر دوسرے روز بھی چھاپا مار کارروائی جاری رکھی، جس میں ایک نوجوان سمیت کم از کم پانچ فلسطینی شہید ہوئے۔
وفا نیوز ایجنسی کی رپورٹ کے مطابق جنوبی غزہ کے علاقے رفح میں رہائشی مکانات پر اسرائیلی حملوں میں کم از کم 8 فلسطینی شہید ہو گئے ہیں، جن میں زیادہ تر خواتین اور بچے ہیں۔ مجموعی شہادتوں میں بھی بڑی تعداد خواتین اور بچوں کی ہے۔
ادھر اسرائیلی فورسز نے رفح سے ملحقہ علاقوں میں مزید فوج تعینات کر دی ہے اور ضلع کے مشرقی علاقوں میں زرعی اراضی کو تباہ کر دیا ہے۔
