بھارت میں نارکوٹکس کنٹرول بیورو نے منشیات بنانے والی تین جدید ترین لیبارٹری سے بھارتی 300 کروڑ روپے سے زیادہ کی منشیات ضبط کرلی۔
بھارتی میڈیا رپورٹس کے مطابق نارکوٹکس کنٹرول بیورو نے گجرات پولیس کے ہمراہ بڑی کارروائی کی ہے اس دوران راجستھان میں منشیات بنانے والی تین جدید ترین خفیہ لیبارٹریوں کا پردہ فاش کیا ہے اور 300 کروڑ روپے سے زیادہ کی منشیات ضبط کرلی۔
بھارتی میڈیا کے مطابق متعدد ریاستوں میں رات بھر کی کارروائی میں 149 کلو میفیڈرون (پاؤڈر اور مائع کی شکل میں)، 50 کلوگرام ایفیڈرین اور 200 لیٹر ایسیٹون ضبط کی گئی جبکہ کارروائی کے دوران 7 افراد کو گرفتار کیا گیا ہے۔
بھارتی حکام کے مطابق نیٹ ورک کے سرغنہ کی شناخت بھی کر لی گئی ہے جلد ہی گرفتار کر لیا جائے گا، ان ادویات کی تقسیم کے نیٹ ورک، قومی اور بین الاقوامی روابط کا سراغ لگانے کی کوششیں جاری ہیں۔
