آسٹریلین والی بال ٹیم سیریز کھیلنے کے لیے پہلی بار تاریخی دورے پر پاکستان پہنچ گئی، پاکستان والی بال فیڈریشن حکام نے ٹیم کا استقبال کیا۔
تفصیلات کے مطابق آسٹریلیا کی قومی والی بال ٹیم نحیمیا موٹے کی قیادت میں اسلام آباد انٹرنیشنل ایئر پورٹ پہنچی۔ اس موقع پر انھیں پھولوں کا گلدستہ پیش کیا گیا جبکہ آسٹریلوی کھلاڑیوں کے چہرے پر بھی مسکراہٹ رقصاں تھی۔
پاکستان والی بال فیڈریشن کے چیٸرمین چوہدری محمد یعقوب نے کہا کہ پہلی بار آسٹریلیا کی میزبانی کرنے پر خوشی ہے، مضبوط ٹیم کیخلاف بہتر پرفارمنس کیلٸے پرامید ہیں۔
والی بال سیریز کے کامیاب انعقاد کیلٸے تمام انتظامات مکمل کر لٸے ہیں۔ آسٹریلیا کیخلاف قومی والی بال ٹیم کی قیادت مراد جہاں کریں گے۔
خیال رہے کہ آسٹریلین والی بال ٹیم عالمی درجہ بندی میں 35ویں رینک کی حامل ہے جبکہ پاکستان کی ٹیم 51 ویں نمبر پر براجمان ہے۔
پاکستان اور آسٹریلیا کی والی بال ٹیمیں 3 میچوں کی سیریز میں مدمقابل ہوں گی، میچز لیاقت جمنازیم پاکستان اسپورٹس کمپلیکس میں کھیلے جائیں گے۔
دونوں ٹیمیں سیریز کے پہلا میچ میں 28 مئی کو آمنے سامنے آئیں گی جبکہ دوسرا مقابلہ 29 اور تیسرا میچ 30 مئی کو شیڈول ہے۔
