اسلام آباد : عدالت نے تھانہ بنی گالا مقدمے میں وزیر اعلیٰ خیبرپختونخوا علی امین گنڈاپور کو بری کردیا۔
تفصیلات کے مطابق اسلام آباد میں ڈسٹرکٹ اینڈ سیشن کورٹ میں تھانہ بنی گالامیں مقدمہ سے متعلق سماعت ہوئی۔
مدعی مقدمہ عامر زمان وکیل رضوان اعظم عباسی کے ہمراہ عدالت میں پیش ہوئے، مدعی مقدمے نے بتایا کہ واقعے میں زخمی ہونے والا شخص ملک سے باہر ہے۔
عدالت نے اسکائپ کے ذریعے بیان ریکارڈ کرانے کی ہدایت کرتے ہوئے کہا کہ اس کی اسکائپ آئی ڈی دیں۔
وکیل مدعی نے کہا کہ علی امین گنڈا پور 109 کی حد تک تھے، ان سے کمپرومائز ہوچکا ہے اور نامزد ملزمان کو بھی معاف کردیا ہے۔
بیرون ملک ہونے کے باعث متاثرہ شخص محمد ولید کا آن لائن بیان لیا گیا، عدالت نے محمد ولید سے استفسار کیا اس مقدمے میں آپ نے راضی نامہ کرلیا ہے ، جس پر محمد ولید نے بیان میں کہا کہ جی میں نے فی سبیل اللہ معاف کردیا ہے۔
عدالت نے وزیر اعلیٰ خیبرپختونخوا کو مقدمے سے بری کردیا، سول جج قدرت اللہ نےعلی امین گنڈا پور سمیت تمام ملزمان کو بری کیا۔
