افغان طالبان کی دہشت گردوں کے ساتھ ملکر پاک افغان سرحد پر سیکیورٹی فورسز پر حملوں کی منصوبہ بندی کی ویڈیو منظرِ عام پر آگئی۔
تفصیلات کے مطابق افغان سرزمین دہشت گردی کیلئے استعمال ہونے کے ثبوت منظر عام پر آگئے، ویڈیو میں دیکھا جاسکتا ہے کہ تحریک طالبان افغانستان (ٹی ٹی اے) کس طرح پاکستان پر حملوں کی منصوبہ بندی کررہی ہے۔
ویڈیو میں ٹی ٹی اے دہشت گرد یحییٰ ساتھیوں کو حملوں کی ہدایت دے رہا ہے، ٹی ٹی اے کمانڈر دہشت گردوں کوبتا رہا ہے ہم پاکستان سے بدلہ لینے کیلئے تیار ہیں، دہشت گردوں کو بتایا گیا آپ کیساتھ 6 راکٹ چلانے والے، 6 معاونین ہوں گے۔
ٹی ٹی اے کمانڈر یحییٰ نے کہا کہ 2 لیزر والے، 2 کے معاونین جبکہ ایک اسنائپر والا بھی ہو گا، یہ سب مجاہدین امیر المومنین شیخ عباداللہ کے احکامات پر تیار ہیں۔
منظرِ عامر پر آنے والی ویڈیو میں خودکش بمبار کو بھی دیکھا جا سکتا ہے، ویڈیو میں دہشت گردوں کو پاکستان کیخلاف لڑنے پر رضا مندی ظاہر کرتے ہوئے بھی دیکھا جاسکتا ہے۔
رپورٹ کے مطابق ٹی ٹی اے پاک افغان سرحد سے سیکیورٹی فورسز پر حملوں کی منصوبہ بندی میں ملوث ہے ساتھ ہی تحریک طالبان افغانستان دہشت گردوں کو پوری مدد فراہم کرنے میں مصروف ہے۔
پاکستان کئی بار کہہ چکا ہے کہ افغان حکومت دہشت گردوں کو اپنی سر زمین استعمال نہ کرنے دیں، دہشت گرد افغان سرزمین استعمال کر کے پاکستان پر حملے کرتے رہے ہیں اور اب ویڈیو شواہد بھی آگئے۔
