پاکستان اور جنوبی افریقہ کے درمیان سینچورین میں جاری پہلا کرکٹ ٹیسٹ میچ دلچسپ مرحلے میں داخل ہو گیا ہے، جہاں مہمان ٹیم کو سات وکٹیں تو میزبان بیٹرز کو مزید 131 رنز درکار ہیں۔
میچ کے تیسرے دن جب کھیل ختم ہوا تو جنوبی افریقہ نے اپنی دوسری اننگز میں 27 رنز بنائے تھے اور اس کے تین کھلاڑی پویلین واپس پہنچ چکے تھے۔
اگر پاکستانی بولرز سات وکٹیں لینے میں کامیاب ہو جاتے ہیں تو یہ 17 سال میں پہلی بار ہو گا جب پاکستان جنوبی افریقہ سے کوئی ٹیسٹ میچ جیتے گا۔
پاکستان کو جیت کے قریب پہنچانے میں سعود شکیل کی شاندار فائٹنگ اننگز کا حصہ ہے۔
آج کھیل کا آغاز بارش اور کم روشنی کی وجہ تین گھنٹے تاخیر سے شروع ہوا۔
پاکستان نے کھیل کے دوسرے دن کے اختتام پر 88 رنز بنائے تھے، جبکہ اس کے تین کھلاڑی آؤٹ ہوئے تھے۔
تیسرے دن بارش رکنے کے بعد کھانے سے ایک گھنٹے بعد میچ دوبارہ شروع ہوا تو بابر اعظم اور سعود نے دوبارہ بیٹنگ کا آغاز کیا۔
دونوں نے محتاط انداز میں پاکستان کا سکور آہستہ آہستہ آگے بڑھانا شروع کیا۔
انگلینڈ کے خلاف ٹیسٹ سیریز میں ڈراپ ہونے والے اور اس میچ کی پہلی اننگز میں ناکام رہنے والے بابر نے آج اچھا کھیل پیش کرتے ہوئے نصف سنچری مکمل کی۔
انھوں نے سعود کے ساتھ چوتھی وکٹ کے لیے 79 رنز کی رفاقت کی۔ وہ 50 رنز بنا کر مارکو یانسن کی گیند پر کیچ آؤٹ ہو گئے۔
بابر کے بعد پاکستان کی دو وکٹیں جلدی گر گئیں۔ محمد رضوان تین اور سلمان علی آغا ایک رنز بنا کر آؤٹ ہوئے۔ دونوں یانسن کا نشانہ بنے۔
اس دوران سعود جم کر بیٹنگ کرتے رہے اور جب بھی موقع ملا گیند کو باؤنڈری کے پار لگایا۔
انھوں نے اپنی نصف سنچری بھی مکمل کی۔ عامر جمال نے ان کا کچھ ساتھ دیا لیکن وہ بھی 18 رنز بنا کر آؤٹ ہو گئے۔
پاکستان کی طرف سے سب سے زیادہ رنز بنانے والے سعود یانسن کی ایک فل ٹاس پر ایل بی ڈبلیو ہو گئے۔ انھوں نے 84 رنز بنائے۔
پاکستان کی آخری وکٹ جب گری تو مجموعی سکور 237 رنز تھا۔ آخری آؤٹ ہونے والے محمد عباس تھے جنھیں بوش نے آؤٹ کیا۔
پاکستان جنوبی افریقہ کی پہلی اننگز کی برتری 82 رنز سے صرف 147 رنز ہی بنا سکا۔
اس سیکشن میں متعلقہ حوالہ پوائنٹس شامل ہیں (Related Nodes field)
جنوبی افریقہ کے یانسن نے 52 رنز دے کر چھ کھلاڑی آؤٹ کیے۔
جنوبی افریقہ، جسے جیت کے لیے 148 رنز کا ہدف عبور کرنا تھا، اپنی دوسری اننگز میں لڑکھڑا گیا۔
عباس اور خرم شہزاد کی شاندار سیم بولنگ نے جنوبی افریقہ کے تین کھلاڑی بہت کم وقت میں آؤٹ کر دیے۔
اوپنر ٹونی ڈے زوزی کو عباس نے دو رنز پر ایل بی ڈبلیو کیا۔ ریان رکلٹن کو صفر پر خرم نے ایل بی ڈبلیو کیا۔
ٹرسڑان سٹبس بھی زیادہ دیر نہ رک سکے اور عباس کی گیند پر ایک رن بنا کر ایل بی ڈبلیو ہو گئے۔
پہلی اننگز کے کامیاب بلے باز ایڈم مارکرم کریز پر موجود ہیں اور 22 رنز بنا چکے ہیں ان کے ساتھ کپتان ٹمبا باووما ہیں۔
جنوبی افریقہ نے آج کھیل ختم ہونے پر 27 رنز بنائے ہیں اور اسے مزید 137 رنز درکار ہیں۔
پچ پر موجود دوہرے باؤنس اور ڈبل پیس کے باعث چوتھے دن بیٹنگ بہت مشکل ہوگی۔
پاکستانی بولرز بہت عمدگی سے پچ کا باؤنس استعمال کر رہے ہیں، جس کے باعث میچ کسی طرف بھی جا سکتا ہے۔
پاکستان جنوبی افریقہ میں اب تک صرف دو ٹیسٹ میچ جیت سکا ہے۔
