فلم ’منا بھائی ایم بی بی ایس‘ میں اپنی شاندار اداکاری کے لیے مشہور ارشد وارثی نے حال ہی میں انکشاف کیا ہے کہ اس فلم کے بہت سے مزاحیہ مکالمے وہ موقعے پر ہی تخلیق کرتے تھے۔
انہوں نے بتایا کہ وہ اپنے ارد گرد کے ماحول کو دیکھتے ہوئے نئے سین لکھ کر ہدایت کار راجکمار ہیرانی کے ساتھ شیئر کرتے، جو انہیں پسند بھی آتے۔
ایک انٹرویو میں ارشد وارثی نے کہا کہ وہ کبھی کبھی خود کو ٹیلی ویژن پر دیکھ کر سوچتے ہیں کہ ’یہ مزاحیہ ہے‘ اور وہ اپنے کام کو پسند کرتے ہیں۔
خاص طور پر فلم کے ایک منظر کا ذکر کرتے ہوئے انہوں نے کہا کہ وہ ایمبولنس میں ایک غیر ملکی کو اغوا کرنے کی کوشش کر رہے تھے۔
اس وقت انہوں نے مزاحیہ ڈائیلاگ کہا کہ ’کیا آپ مادھوری ڈکشٹ سے ملنا چاہیں گے؟ وہ وین میں بیٹھی ہے،‘ لیکن اس ڈائیلاگ کو بعد میں تبدیل کر دیا گیا۔
وارثی نے مزید کہا کہ جب وہ سیٹ پر ہوتے ہیں تو نئے خیالات ان کے ذہن میں آتے ہیں۔ انہوں نے وضاحت کی کہ ’ایک اے سی کمرے میں بیٹھ کر سکرپٹ لکھنا‘ اور ’سیٹ پر آ کر لوگوں سے ملنا‘ بالکل مختلف تجربے ہیں۔
ان کا کہنا تھا نئے خیالات تب آتے ہیں جب آپ حقیقت میں لوگوں کے تجربات کو دیکھتے ہیں۔
فلم کے حوالے سے وارثی نے ہدایت کار راج کمار ہیرانی کی تعریف کی اور کہا کہ ’راجو‘ ایک بہترین ایڈیٹر ہیں جو ان کے خیالات کو سمجھتے ہیں اور انہیں سین میں شامل کرتے ہیں۔
اس سیکشن میں متعلقہ حوالہ پوائنٹس شامل ہیں (Related Nodes field)
ان کا کہنا تھا کہ ’وہ مزاح کو بہت اچھی طرح سمجھتے ہیں‘ اور ان کی وجہ سے بہت سے لطیفے کامیاب ہوئے۔
’منا بھائی ایم بی بی ایس‘، جو 2003 میں ریلیز ہوئی، ایک بڑی کامیاب فلم رہی، نہ صرف تجارتی بلکہ تنقیدی طور پر بھی۔
فلم نے بہترین مقبول فلم کا قومی فلم ایوارڈ بھی حاصل کیا تھا۔ اس کی کامیابی کی وجہ سے اس کا سیکوئل بھی بنایا گیا، ’منا بھائی ایل ایل بی‘، جو 2006 میں ریلیز ہوا۔
حال ہی میں راج کمار ہیرانی نے فلم کے تیسرے سیکوئل کے بارے میں کچھ دلچسپ باتیں شیئر کیں۔ انہوں نے کہا کہ ان کے پاس ’منا بھائی‘ کے لیے پانچ مختلف سکرپٹس ہیں اور انہوں نے ایک سکرپٹ پر چھ ماہ کام کیا ہے۔
ہیرانی نے یہ بھی بتایا کہ سنجے دت، جو فلم کے مرکزی کردار میں ہیں، ایک اور ’منا بھائی‘ فلم کرنے کی خواہش رکھتے ہیں۔
