کراچی کے علاقے فیروز آباد میں موبائل فونز سے بھری وین چھین لی گئی جن کی مالیت دو کروڑ روپے بتائی جاتی ہے۔
اے آر وائی نیوز کے مطابق کراچی کے علاقے فیروز آباد میں دو کروڑ روپے مالیت کے موبائل فونز سے بھری وین چھین لی گئی۔ کوریئر کمپنی کی ڈیلیوری وین صدر کے علاقے سے موبائل فون لے کر نکلی تھی کہ ملزمان نے فیروز آباد میں سائیڈ مار کر ڈیلیوری وین کو روکا اور گاڑی کو ڈرائیور سمیت ساتھ لے گئے۔
رپورٹ کے مطابق واردات کرنے والے مسلح ملزمان رکشے اور لوڈنگ گاڑی میں سوار تھے جنہوں نے 45 منٹ بعد ڈرائیور کو اتار کر ڈیلیوری وین لے کر فرار ہو گئے۔
ڈرائیور نے ہیڈ آفس پہنچ کر واردات کی اطلاع دی تو ٹریکر کی مدد سے وین کا سراغ لگایا گیا جو بعد ازاں ٹیپو سلطان کے علاقے پارسا ٹاور کے قریب لاوارث حالت میں ملی۔ کمپنی کا عملہ جب وین تک پہنچا تو وہ خالی تھی۔
واردات کے حوالے سے پولیس کا کہنا ہے کہ کوریئر کمپنی کی ڈیلیوری وین کے ڈرائیور کا بیان قلمبند کیا جا رہا ہے۔ ڈرائیور نے واردات کا وقت رات سوا دس بجے کا بتایا ہے جب کہ وین میں موبائل فون کے 35 کارٹن موجود تھے اور ہر کارٹن میں 10 سے 12 موبائل فونز موجود تھے۔
پولیس کے مطابق موبائل فون کی مالیت لگ بھگ 2 کروڑ روپے کے قریب بتائی جا رہی ہے جب کہ واردات کے مقام پر اطراف میں کسی کو واقعےکا علم نہیں تھا، واقعے کی تحقیقات جاری ہیں۔
