متحدہ عرب امارات میں ایئر ٹیکسی سروس کا آغاز 2026 سے کر دیا جائے گا جس کے معاہدے پر اتوار کو دستخط کر دیے گئے ہیں۔
دبئی میڈیا آفس کے مطابق معاہدے پر دستخط کے لیے منعقدہ تقریب میں متحدہ عرب امارات کے نائب صدر اور وزیر اعظم شیخ محمد بن راشد المکتوم نے بھی شرکت کی۔
معاہدے پر دبئی کی روڈز اینڈ ٹرانسپورٹ اتھارٹی (آر ٹی اے)، جنرل سول ایوی ایشن اتھارٹی، دبئی سول ایوی ایشن اتھارٹی اور برٹش سکائی پورٹس انفراسٹرکچر اور یو ایس جوبی ایوی ایشن نے ورلڈ گورنمنٹ سمٹ کے موقع پر دستخط کیے۔
ایکس پر دبئی میڈیا آفس کی جانب سے جاری بیان کے مطابق معاہدے کے تحت دبئی دنیا کا پہلا شہر ہوگا جہاں 2026 تک الیکٹرک ورٹیکل ٹیک آف اینڈ لینڈنگ (ای وی ٹی او ایل) طیاروں کے ذریعے مستقل فضائی ٹیکسی خدمات کے لیے ’ورٹی پورٹس‘ کا مکمل طور پر تیار کردہ نیٹ ورک ہوگا۔
بیان میں بتایا گیا ہے کہ ایئر ٹیکسی سروس کے افتتاحی مرحلے میں دبئی انٹرنیشنل ایئرپورٹ، دبئی ڈاؤن ٹاؤن، دبئی مرینا اور پام جمیرہ جیسے اہم مقامات کے قریب واقع چار ورٹی پورٹ سٹیشن شامل ہیں۔
دبئی میڈیا آفس کے مطابق اس نئی سروس سے دبئی ایئرپورٹ سے پام جمیرہ تک کا سفر 45 منٹ سے گھٹ کر صرف 10 کا رہ جائے گا۔
