بہاولپور: دریائے ستلج ایمپریس برج کے قریب لنڈا بند ٹوٹنے سے ہزاروں ایکڑ فصل تباہ ہو گئی، کچے مکان بہہ گئے۔
تفصیلات کے مطابق بہاولپور میں دریائے ستلج ایمپریس برج کے قریب بند ٹوٹ گیا، جس کے بعد سیلابی پانی موضع ویسلاں، ساہلاں لعل دی گوٹھ میں داخل ہو گیا، بند ٹوٹنے سے ہزاروں ایکڑ فصل بھی تباہ ہو گئی اور کچے مکان بہہ گئے۔
متاثرین کو محفوظ مقام پر منتقل کرنے کے لیے ریسکیو آپریشن جاری ہے، ایمپریس برج سے اس وقت ایک لاکھ 30 ہزار کیوسک کا ریلا گزر رہا ہے، جب کہ میلسی سائفن پر پانی کی سطح بلند ہو کر ایک لاکھ 46 ہزار کیوسک پر پہنچ گئی ہے۔
ایک طرف بہاولپور کے مقام پر دریائے ستلج میں اونچے درجے کا سیلابی ریلا گزر رہا ہے، اور دوسری جانب ضلعی انتظامیہ جشن منا رہی ہے، سیلابی ریلے سے متعدد حفاظتی بند ٹوٹے، کئی علاقے زیر آب آئے، لیکن کمشنر اور ڈپٹی کمشنر کے ساتھ دیگر اعلیٰ حکام اپنے گھر والوں کے ساتھ جم خانہ میں جاری میوزیکل کنسرٹ سے لطف اندوز ہوتے رہے۔
