بالی وڈ اداکار شاہ رخ خان کے دفتر نے منگل کو واضح کیا کہ مشہور سٹار کا انڈیا کے قطر سے حال ہی میں رہا ہونے والے آٹھ مبینہ جاسوسوں کی رہائی میں کوئی عمل دخل نہیں تھا۔
پیر کو انڈین وزارت خارجہ نے بتایا تھا کہ قطر نے انڈین بحریہ کے ان آٹھ سابق افسران کو رہا کر دیا ہے جنہیں گذشتہ سال سزائے موت سنائی گئی تھی۔
اس خبر کے بعد انڈین سابق رکن پارلیمان (راجیہ سبھا) سبرامنین سوامی نے دعویٰ کیا تھا کہ شاہ رخ خان نے قطر کے حکام کو اس بات پر راضی کیا کہ وہ آٹھ سزایافتہ شہریوں کو رہا کریں۔
انہوں نے سوشل میڈیا پلیٹ فارم پر انڈین وزیراعظم نریندر مودی کی ٹویٹ کے جواب میں کہا: ’مودی کو چاہیے کہ انڈین سینیما سٹار کو ساتھ قطر لے جائیں کیونکہ وزارت خارجہ اور نیشنل سکیورٹی اتھارٹی قطر کے حکام کو اس بات پر آمادہ نہ کر سکے، مودی نے خان کی منت کی کہ وہ مداخلت کرے اور اس کے بعد قطر کے حکام سے ایک مہنگے معاہدے کے بعد نیول افسران کو رہا کیا گیا۔‘
Modi should take Cinema star Sharuk Khan to Qatar with him since after MEA and NSA had failed to persuade the Shiekhs of Qatar, Modi pleaded with Khan to intervene , and thus got an expensive settlement from the Qatar Shiekhs to free our Naval officers.
— Subramanian Swamy (@Swamy39) February 13, 2024
تاہم اس دعوے کو مسترد کرتے ہوئے شاہ رخ خان کی ٹیم مینیجر پوجا ڈاڈلانی نے انسٹاگرام پر شاہ رخ خان کی دفتر کی جانب سے جاری بیان شیئر کیا جس میں کہا گیا کہ: ’میڈیا میں جو خبریں گردش کر رہی ہیں کہ شاہ رخ خان نے آٹھ انڈین نیول افسران کہ قطر سے رہائی میں مبینہ طور پر کردار ادا کیا ہے، شاہ رخ خان کے آفس کا (اس ضمن میں) کہنا ہے کہ ان کی کسی بھی قسم کی مداخلت کی قیاس آرائیاں بے بنیاد ہیں۔‘
انہوں نے کہا کہ یہ کام انڈین حکام نے انجام دیا اور شاہ رخ خان اس میں کردار کی باتوں کو مسترد کرتے ہیں۔
اس سیکشن میں متعلقہ حوالہ پوائنٹس شامل ہیں (Related Nodes field)
مینیجر نے بیان میں یہ بھی کہا کہ ’شاہ رخ خان بیشتر انڈین شہریوں کی طرح خوش ہیں کہ نیول افسران خیریت سے گھر پہنچ گئے اور ہم ان کے لیے نیک تمناؤں کا اظہار کرتے ہیں۔‘
انڈین سزای یافتہ شہریوں کی رہائی
اس سے قبل انڈیا نے قطر میں مبینہ جاسوسی کے الزام پر گرفتار اپنے آٹھ شہریوں کی رہائی کا خیرمقدم کرتے ہوئے امیر قطر شیخ تمیم بن حماد الثانی کا شکریہ ادا کیا۔
خبررساں ادارے روئٹرز کے مطابق انڈیا کی وزارت خارجہ نے پیر کو کہا کہ: ’ہم امیر قطر کی جانب سے ان شہریوں کی رہائی اور وطن واپسی کے فیصلے کو سراہتے ہیں اور آٹھ میں سے سات افراد انڈیا واپس آ چکے ہیں۔‘
انڈین میڈیا کے مطابق قطری حکام کے لیے ایک نجی کمپنی کے ساتھ آبدوز پروجیکٹ پر کام کرنے والے آٹھ انڈین شہریوں کو 2022 میں گرفتار کیا گیا تھا۔ ان افسران پر مبنیہ طور پر اسرائیل کے لیے جاسوسی کرنے کا الزام تھا۔
انڈین وزارت خارجہ نے کبھی بھی آٹھ انڈین شہریوں یا ان کے مبینہ جرائم کے بارے میں تفصیلات نہیں بتائیں اور قطر نے بھی اس معاملے پر کوئی تبصرہ نہیں کیا اور نہ ہی الزامات کو عام کیا۔
تاہم انڈین میڈیا کے مطابق کہ ان افراد کو اگست 2022 میں دوحہ میں گرفتار کیا گیا تھا جن میں سابق اعلیٰ عہدے دار اور اعلیٰ افسران بھی شامل تھے۔
گذشتہ سال اکتوبر میں انڈیا نے کہا تھا کہ قطری عدالت کی جانب سے انہیں سزائے موت سنائے جانے کے بعد وہ حیران ہے لیکن دسمبر میں ان افراد کی سزا کم کر دی گئی تھی۔