اسلام آباد: فیصل مسجد پارکنگ میں قلفی بیچنے والے ریڑھی بان فرمان اللہ کی ضمانت منظور ہو گئی، اسلام آباد ہائی کورٹ نے فرمان اللہ کی رہائی کا حکم دے دیا۔
تفصیلات کے مطابق اسلام آباد ہائی کورٹ نے قلفی فروش فرمان اللہ کی قید اور جرمانے کا مجسٹریٹ کا فیصلہ معطل کرتے ہوئے فریقین کو نوٹس جاری کر دیے، اور مدعی کی فوری رہائی کا حکم جاری کر دیا۔
فرمان اللہ گزشتہ کئی دہائیوں سے وفاقی دارالحکومت میں فیصل مسجد کی پارکنگ میں ریڑھی لگا کر قلفی بیچ رہے ہیں، سی ڈی اے کی جانب سے ان کے خلاف کارروائی کی گئی تھی، بی بی سی نے بھی اس پر رپورٹ شائع کی تھی، مجسٹریٹ نے فرمان اللہ کو پانچ لاکھ روپے جرمانہ کر کے جیل بھیج دیا تھا۔
فرمان اللہ کی جانب سے اس سلسلے میں اسلام آباد ہائی کورٹ میں درخواست دائر کی گئی تھی، جس پر جسٹس طارق محمود جہانگیری نے کیس کی سماعت کی، درخواست گزار کی جانب سے بیرسٹر عمر اعجاز گیلانی عدالت پیش ہوئے۔
وکیل درخواست گزار نے عدالت کو بتایا کہ فرمان اللہ پر بنیادی الزام یہ لگایا گیا کہ انھوں نے بغیر لائسنس کے فیصل مسجد کی پارکنگ میں ریڑھی لگائی، عدالت نے استفسار کیا کہ کیا چارج فریم ہوا ہے؟ وکیل نے بتایا کہ ابھی تک کوئی چارج فریم نہیں ہوا، چالان جمع ہوا ہے، اور میرے مؤکل کو مجرم قرار دیا گیا، حالاں کہ انھوں نے مانا ہے کہ وہ اپنا گھر چلانے کے لیے فیصل مسجد کی پارکنگ میں ریڑھی لگاتا ہے۔
عدالت نے کیس کی سماعت کے بعد مجسٹریٹ کا فیصلہ معطل کر دیا اور فرمان اللہ کی فوری رہائی کا حکم دیتے ہوئے فریقین کو نوٹس جاری کر دیے۔
