آئینہ اور پھول / سلمان باسط

میرے قدم ایک دم رُک گئے۔ایسا لگا کسی نے آواز دی ہو۔راہداری کے موڑ پر لمحہ بھر کو سرمئی آنچل لہرایااور غائب ہوگیا۔ اک مانوس سے مہک میری سانسوں میں اترنے لگی وہ وہی تھی ۔۔۔۔۔۔ وہی ۔۔۔۔۔جو نجانے کب میرے خوابوں کی منڈیر پر چڑھ آئی تھی کسی زہریلی آئی وی کی طرح ۔ رگ رگ میں اترےاس کے وَش نے مجھے بےسدھ کردیا۔۔میری آنکھیں کچھ اور دیکھنا بھول گئیں۔
لیکن۔۔۔۔۔ میں نے پلٹ کر دیکھا۔ راہداری ویران تھی۔۔۔۔ وہاں کوئی نہیں تھا۔۔۔۔۔ میری نظریں کھڑکی کی طرف اٹھیں شفاف شیشے کے اس پار سر سبز لان میں گلابی دھوپ اوڑھے اس کا کندن بدن ۔۔۔۔۔۔وہ پودوں اور پھولوں کی روشوں میں تتلیوں کے سنگ لکن میٹی کھیلنے لگی۔۔۔۔۔
” یار تو پھر کہیں گم ہے” وقار کی دھپ بڑے زور سے میرے شانے سے ٹکرائی میں سٹپٹا گیا
"آں ۔۔۔۔ ہاں۔۔۔۔۔۔۔۔ اور وہ کھلکھلا کر ہنس دیا
” کہاں ہے وہ؟”
” وہ کون؟”
” وہی جس نے تجھے دیوانہ کر دیا ہے”
میں اسے کیا بتاتا۔۔۔۔ وہ تو آئینے میں کھلا ہوا پھول تھی۔ صبحِ کاذب کا فریب۔۔۔۔۔۔ گرمیوں کی دوپہروں کا کوئي حبس بھرا بھید ۔۔۔۔۔۔۔۔شام کے جھٹپٹے کا طلسم ۔۔۔۔ جاڑوں کی تاریک راتوں کا سرسراتا ہوا کوئی پر اسرار سایہ۔۔۔۔۔۔۔۔۔ کیا تھی وہ۔۔۔۔۔۔۔۔۔۔ میں نہیں جانتا۔۔۔۔۔۔ہاں اتنا جانتا ہوں وہ میری روح میں اتر گئی تھی۔۔۔۔۔۔
درخت زردیوں کی لپیٹ میں تھے ۔۔۔ کالج کے لان میں ٹھنڈی شاخوں سے سرگوشیاں کرتی ہوا۔۔۔۔۔۔۔۔۔۔
” سنو” ۔۔۔۔ میرے قدم رک گئے
” کہو” میری بے تابی عروج پر تھی۔۔۔۔ وہ چھم سے میرے سامنے آ کھڑی ہوئی۔۔۔۔اپنی اسی قاتل مسکان کے ساتھ اور مجھے یکدم نہتا کر دیا۔۔۔۔۔ ذات کے شہر پناہ کی تمام دیواریں بھربھری ریت کی طرح بیٹھنے لگیں۔۔۔۔۔۔۔۔۔میں نے ہاتھ بڑھا کر اسے چھونا چاہا۔۔۔۔۔ لیکن سرد آئینے سے ٹکراتی ہوئی انگلیاں۔۔۔۔۔۔۔۔۔ میں کسی سراب میں دھنسنے لگا۔
"کیا جاگتے میں بھی خواب نظر آتے ہیں؟”
” تم پاگل ہو” آواز کہیں قریب سے آئی تھی
” آپ سبزی نہیں لائے؟ ” آواز میں غصہ اور جھلاہٹ نمایاں تھی
میں نے تھیلا خاموشی سے اپنی شریک حیات کے حوالے کیا اور اندر آگیا۔۔۔۔۔
اوائل عمری کا آسیب آج بھی مجھ پر قابض تھا۔۔۔۔۔ ایسے آسیب آسانی سے کب جان چھوڑتے ہیں۔ میں نےسگریٹ سلگا لیا۔۔۔۔۔۔۔ ڈھلتی دوپہر کے لمبے ہوتے سائے اوڑھے وہ پھر سے میرے سامنے تھی۔۔۔۔ اس نے خاموشی سے میرا ہاتھ تھام لیا۔۔۔۔۔۔۔کچے دھول اڑاتے راستے پر کم سن آنکھوں میں بھری حیرانی ۔۔۔۔۔۔ کانوں کی لووں سے الجھتیں بکھرے بالوں کی لٹیں ۔۔۔۔۔۔۔۔ روشن ماتھے پر دمکتے پسینے کے موتی۔۔۔۔۔۔۔۔۔۔۔۔۔میرے ہاتھوں میں اس کے ہاتھوں کا لمس ایک نم آلود آنچ دینے لگا۔ اس دور افتادہ کچی سڑک پر ہمارے گرد آلود پاؤں جانے کس طرف بڑھ رہے تھے۔ قریب سے گزرتے سائیکل کی تیز گھنٹی ۔۔۔۔۔۔ہم لمحہ بھر کو ٹھٹھکےضرور لیکن انجانی سمتوں میں اٹھتے قدم نہ رکے۔۔۔۔۔۔۔ سکول کا نیلے رنگ کا سائن بورڈ۔۔۔۔۔۔۔۔۔۔۔ ہماری سست رفتاری کے باوجود ہم سے پیچھےرہ گیا۔۔۔۔۔
سکول کا سائن بورڈ۔۔۔۔۔ میرے اندر بے چینی تھی۔۔۔۔۔۔بالوں میں اترتی چاندی کے ساتھ میں اسی نیلے سائن بورڈ کے سامنے کھڑا تھا۔۔۔۔۔۔۔۔۔۔۔ ہاتھوں میں نم آلود آنچ دیتا لمس۔۔۔۔
” سر جی بچ کے” سائیکل کی تیز گھنٹی مجھے پھر سے چونکا گئی
ایک روز کلبلاتی سوچوں نے مجھے قلم تھما دیا۔ شعر، نظمیں، افسانے۔۔۔۔۔۔۔۔۔۔۔ اس کے خدو خال حروف میں ڈھلنے لگے۔ لفظ تصویر ہونے لگے اس کا روشن، دمکتا ہواحسین چہرہ ۔۔۔۔ سیاہ آنکھیں۔۔۔۔۔۔ ٹھوڑی پر ہاتھ رکھے وہ میری نظموں کی چلمنوں سے جھانک کر پوچھا کرتی
"ابھی اور کتنا لکھنا ہے؟”
نثر میں آلتی پالتی مار کر بیٹھ جاتی ۔۔۔۔۔۔۔۔ شعروں میں دھڑکنے لگتی۔ میں گھبرا کر گاؤں کی چوپال میں سب سے پیچھے جا کر چپکے سے بیٹھ جاتا۔ کوئی لَے اٹھاتا۔۔۔۔۔
” آ مل یارا سار لے میری
میری جان دُکھاں نے گھیری
اندر خواب وچھوڑا ہویا، خبر نہ پیندی تیری”
میری آنکھوں میں دھواں بھرنے لگتا۔ آنسو حلق میں اتر آتے اور بیٹھنا محال ہو جاتا۔ دانشوروں کی بیٹھک میں جانے کس کیفیت کے زیرِاثر گنجلک ادبی گفتگو کرنے لگتا۔۔۔۔۔۔۔۔۔۔۔ زبان و ادب کے رموز سمجھنے اور سمجھانے میں جُٹ جاتا۔۔۔۔۔۔۔۔۔۔۔۔ فلسفے کی گتھیاں سلجھاتے سلجھاتے مزید الجھ جاتیں۔۔۔۔۔۔۔۔۔ کانٹ، ہیگل،افلاطون، ارسطو اور نٹشےمتحرک ہونے لگتے۔۔۔۔۔۔۔۔۔۔ لیکن ہر فلسفہ اسی پر تمام ہوتا۔۔۔۔۔۔۔۔۔ہر نظم کی پنچ لائن وہی ٹھہرتی۔۔۔ میں گھبرا کر کتابوں میں پناہ ڈھونڈ تا۔۔۔۔۔۔۔ہومر کی ایلیڈ اور اوڈیسی مجھے ہانٹ کرنے لگتیں۔۔۔۔۔۔۔۔ دانتے کی ڈیوائن کامیڈی ڈسنے لگتی۔ ملٹن کی پیراڈائز لاسٹ اور شیلی کی اوڈ ٹو دا ویسٹ ونڈ مجھے زمین سے اٹھا کر ماورائی دنیا میں لے جاتیں۔۔۔۔۔۔۔ ہارڈی کے کردار میرے اندر سانس لینے لگتے۔ کیٹس کی اوڈ ٹو نائٹنگ گیل میرے اندر کُوکنے لگی۔۔۔۔۔۔۔۔۔میں چلتا رہا۔۔۔۔۔۔۔۔۔۔۔۔دوڑتا رہا۔۔۔۔۔۔۔۔۔۔۔۔۔ ہانپتا رہا۔۔۔۔۔۔۔۔۔۔۔
” کیا یہ دوڑنا موقوف ہو جائے گا؟” لیکن جواب کون دیتا۔۔۔ میں نے اپنے پاؤں کے چھالوں سے رِستے سرخی مائل پانی کو دیکھا۔۔۔۔۔۔
” آؤ۔۔۔۔ ” کُہرے سے نکل کروہ میری جانب بڑھی اور میرا ہاتھ تھام لیا
” کہاں؟” میں کسی معمول کی طرح اس کے ساتھ ہو لیا
جھیل کے کنارے۔۔۔۔ گھنے درختوں کے بیچ۔۔۔۔۔۔سویٹ پیز اور ڈیفوڈلز کے درمیان۔۔۔۔۔ خوشبوؤں کے دیس میں۔۔۔۔۔۔
اس نے جھک کر میرے کان میں سرگوشی کی
"تمہیں یہیں آنا تھا”۔ صدیوں سے سکوت اوڑھے زندگی نے جیسے مجھ میں یکا یک انگڑائی لی۔ سرما کی نرم دھوپ کی طرح۔۔۔۔۔۔۔۔ شدید حبس میں بادلوں کے گہرے سائے کی طرح۔۔۔۔۔ زندگی کی نوید دیتی بھیگی ہوا کی طرح۔۔۔۔۔۔۔۔ اچانک مہربان ہو جانے والی قسمت کی طرح۔۔۔۔۔۔
اس کے نرم لبوں پر مسکان تھی۔۔۔۔۔۔ وسوسے مجھے ڈسنے لگےاگر کسی روز یہ بادل، پھول، جگنو، تتلیاں اور خوشبو مہربان نہ رہے تو ؟
سگریٹ کی ننھی سے آگ نے میری انگلی کو چھواء۔۔۔۔ لبوں سے بے اختیار آزاد ھونے والی میری سسکاری کافی بلند تھی