دوسرا سمندر / شعیب خالق

یاد ہے وہ سرخ سمندر …………جو لہو کا سمندر دکھائی دے رہا تھا؟
ہاں …………یاد ہے …………اُفق تا اُفق ایک دائرے کی صورت پھیلا …………سرخ سمندر ………… جس کے عکس نے آسمان کو بھی سرخ بنا رکھا تھا ………… لیکن جیسے …………وہ سمندر اور آسمان ………… خود کسی گول غبارے کے اندر …………
…………ہاں مگر وہ ذروں کی یلغار ………… وہ کشتی ………… اور تم …………؟
نجانے میں کیسے ملوث ہو گیا اُس جنگ میں ………… اور وہ کشتی …………جو کہیں سمندر کی تہہ سے اُبھری اور سطح پر آ کر تیرنے لگی ………… وہ سب کیا تھا …………سکوت آلود سلسلہ ………… صدیوں بعد حاصل شدہ دھیمی دھڑکنوں کا انبار ………… فضا میں گھٹن ………… ہزاروں عمروں کی بھوک اور پیاس کا بوجھ ………… میری سوچوں کی طرح بے سمت و لاغر سفر ………… کیا تھا وہ سب؟
وہ ابتدا ء تھی …………اور پھر تمہاری نگاہوں میں کسی جزیرے کو دیکھنے کی ………… تمنا ابھری تھی ………… یاد ہے؟
ہاں ………… بھوک اور پیاس کی ضد بھرے جزیرے کو دیکھنے کی تمنا ………… اور میں کشتی میں لیٹا …………نڈھال بانہوں کی زخمی کہنیوں پر زور دیتے ………… وقفے وقفے سے ………… اُٹھ اُٹھ کر دیکھتا ………… مگر ہر طرف سمندر ہی دکھائی دیتا ………… سرخ پانی جب میری پیاس نہ بجھا پاتا تو ………… بھوک میں شدت بھر جاتی اور ………… میں سانس لینا چاہتا ………… لیکن فضا بھی عجیب تھی ………… میرے وجود کے گرد چپ چپاہٹ ………… بے ہوا موسم ………… آسمان بھی بے چاند و سورج ………… ستاروں سے خالی ………… اور دھیمی دھیمی سرخ روشنی نہ جانے سمندر سے نکلتی یا آسمان سے …………اور بارشیں جو لال چمکتے ریشم کے ریشوں کی طرح چاروں طرف گرا کرتیں …………
اور وہ طوفان بھی تمہیں یاد ہیں؟
طوفان:؟ …………وہ تو سرخ بارش کے ریشوں کی کمر تھوڑا سا خم کھا جاتی ………… اور بس ………… مجھے تو احساس تک نہ ہوتا ………… مگر کبھی کبھی کشتی لرزتی تو محسوس ہوتا جیسے ………… سمندر کی گہرائی میں کوئی ہلچل ہے ………… لیکن بے آواز ………… بے لہر ہلچل ………… شاید کشتی اسی لئے لرزتی کہ وہ ………… سمندر کی تہہ سے ابھری تھی ………… مگر مجھے تو یوں لگتا ہے جیسے ………… سمندر چل رہا ہے اور کشتی ………… ساکت کھڑی ہے۔ تو پھر وہ جزیرہ خود چل کر میرے سامنے آ گیا ہو گا ………… اور اگر میں کشتی کھینچ کر ساحل پر نہ لے آتا تو ………… وہ بھی گزر جاتا ………… کیا معلوم بانہوں کی تکان نے کتنے ہی جزیرے میری نظروں سے اوجھل رکھے۔
وہ ساحل اور ساحل سے کچھ دور درختوں کے جھنڈ تم بھولے تو نہیں۔
نہیں ………… یاد ہے ………… سیاہ درختوں کی چھال میں دراڑیں ………… اور ان میں پھنسے ………… سانپ بچھو اور چکنے کیڑے۔ ………… جیسے میری بھوک اور پیاس کی ضد ………… لیکن جزیرے پر نہ کوئی موسم نہ ہی خوشبو اور …………نہ کہیں وقت کا کوئی جھونکا ………… بے ثمر درخت تو جیسے صدیوں بعد موسم کے رس کا ایک قطرہ چوس پاتے ………… اور اس میں بھی سانپ بچھو اور دوسرے چکنے کیڑوں کی پیاس کا حصہ ہوتا ………… میں نے کشتی کس احتیاط سے ساحل پر چڑھائی تھی مگر …………!
…………مگر وہ سایہ جو درختوں کے جھنڈ میں ………… چھپا بیٹھا ………… تمہیں دیکھ رہا تھا ہے نا؟
ہاں …………سایہ یا سرخ و سیاہ دھند کا ہیولا …………لیکن کون تھا وہ ………… جو مجھے درختوں کی جھنڈ میں چھپا دیکھتا رہا ………… اور میں جب جنگل کے وسط میں پہنچا تو …………تو وہ مجھے ساحل کی جانب بھاگتا ہوا دکھائی دیا ………… وہ کون تھا؟
تم اسے دیکھ ………… پہلے پہل کتنے خوش ہوئے کہ ………… تم جیسا کوئی اور بھی اس سحرزدہ سفر کا شکار تھا ………… لیکن یاد ہے وہ جب ………… ساحل کی طرف دوڑا تو اسے دیکھ کر تمہاری خوشی …………یکسر خوف میں کیوں بدل گئی تھی؟
وہی لرزش زدہ خوف ………… سارے جسم میں پھیل گیا اور …………اس کے تعاقب میں دوڑتے اور چیختے ہوئے …………وقت جیسے کچھ لمحوں کی ہچکی میں بندھا …………میری پھولی ہوئی سانسوں کے راستے ………… اس جزیرے پر نمودار ہوا ………… لیکن بے شکل …………بے رفتار ………… سکوت زدہ چیخیں میرے اندر ہی اندر …………پھیلتی اور سمٹتی رہیں ………… اور وہ میری نظروں کے سامنے ………… کشتی ساحل سے دھکیل اس میں سوار ہوا ………… اور پھر جیسے جزیرہ کشتی سے دور ہوتا چلا گیا ………… میں بھوک اور پیاس سے نڈھال ………… جنگل اور ساحل کے وسط میں گر پڑا تھا ………… کون تھا وہ …………میں تو اسے نظروں سے اوجھل ہونے تک دیکھتا ہی رہا …………
پھر تمہاری بھوک اور پیاس کی ضد تمہیں ………… واپس جنگل کی طرف سے آئی …………یاد ہے وہ ذائقہ؟
ہاں …………سانپ، بچھو اور وہ بے لذت کیڑے ………… مگر ان کا ذائقہ مجھے ساحل پر سرخ پانی پینے کے بعد ملا …………اور پھر اس پانی کی لذت بھی بدل گئی ………… میری بھوک اور پیاس مٹتے ہی…………مجھے نیند آ گئی ………… پھر نہ جانے میں کتنی صدیاں سویا رہا ………… جزیرہ بہتا رہا ………… سمندر چلتا رہا ………… لیکن جب میری آنکھ کھلی تو میرے بڑھے ہوئے وجود کے سوا …………سب کچھ ویسا ہی تھا ………… وہی درختوں کے جھنڈ اور …………
…………اور وہی سمندر …………لیکن اس میں کوئی ہیولا اور کشتی ………… جن کی طرف جزیرہ بڑھ رہا تھا ………… اور کشتی بھی جیسے پھیل کر کچھ بڑی ہو چکی تھی ………… کیوں یاد ہے؟
ہاں ………… وہی کشتی جسے دیکھتے ہی …………میں جنگل کی جانب بھاگ پڑا ………… اور جنگل کے وسط میں پہنچ کر اسی جگہ چھپ گیا ………… جہاں وہ ………… مگر اس کیلئے تو وہ جزیرہ کوئی اور جزیرہ ہو گا ………… شاید وہ خود بھی کوئی اور ہی تھا………… اس نے کشتی احتیاط سے ساحل پر چڑھائی ………… اور آہستہ آہستہ درختوں کے جھنڈ کی جانب بڑھنے لگا ………… پھر جنگل کے وسط میں پہنچ کر جب اس نے پلٹ کر دیکھا تو ………… اسے میں دکھائی دیا ………… کشتی کی طرف بھاگتے بھاگتے ………… جیسے وقت ایک بار پھر ………… میری پھولی ہوئی سانسوں کے راستے ………… لمحہ بھر کو ………… آنکھوں میں نمودار ہوا ………… لیکن بے شکل ………… شاید میرے تعاقب میں وہ مجھ سے بھی تیز دوڑتا رہا …………اس کی بھی سانس پھولی ہو گی ………… اسے بھی دقت محسوس ہوا ہوگا …………لیکن میں نے پلٹ کر نہ دیکھا ………… کشتی سمندر میں ڈال دی اور ………… جزیرہ دور ہوتا چلا گیا۔
لیکن کشتی میں بیٹھتے ہی تم نے …………جب پلٹ کر دیکھا تو؟
وہ میرے تعاقب میں دوڑتے دوڑتے ………… بھوک اور پیاس کی شدت سے نڈھال گر پڑا ………… ساحل اور جنگل کے وسط میں ………… پھر آہستہ آہستہ جزیرہ سمٹتے سمٹتے ………… نقطہ بنا اور …………میری نظروں سے اوجھل ہو گیا ………… لیکن وہ کون تھا………… جو میری نظروں سے اوجھل ہونے تک ساحل پر کھڑا …………مجھے دیکھتا رہا ………… اسے وہاں چھوڑ کر جاتے ہوئے ………… میرے سینے کا درد کیوں مجھ پر منکشف ہوا …………وہ کون تھا؟ ………… وہ کون تھا؟
یاد نہیں ………… وہ کشتی لئے سمندر میں اترا ………… پھر تم کشتی میں سوار ………… اسے جزیرے پر نڈھال ………… نظروں میں گم ہونے تک دیکھتے رہے؟
ہاں یاد ہے ………… زندہ ہونے سے پہلے کے سفر کا ہر رنگ ………… سرخ سمندر …………سحر زدہ جزیرہ ………… وہ کشتی ………… اور وہ ………… مگر ………… مگر …………تم کون ہو………… اور یہ سب تمہیں کیسے یاد ہے؟
میں …………ہاہاہا …………ہاہاہا…………میں وہی تو ہوں ………… لیکن ڈرو نہیں ………… تم بھی ………… میں بھی …………وہی سب کچھ ایسا اب بھی ہے …………سکوت آلود سلسلہ …………بے شکل …………بے رفتار وقت ………… بے ہوا ………… بے موسم فضا سب کچھ وہی ہے ………… بس فرق صرف اتنا ہے کہ ………… اس بار ہم دونوں ایک ہی کشتی میں سوار ہیں ………… کسی جزیرے کو ڈھونڈتے ہوئے ………… ایک اور بے سمت ………… بے آواز سمندر میں!!!