محبت کا گھر

محبت کا گھر

جب ہم ایک محبت میں رہنا شروع کر دیتے ہیں
تو وہ ہمارا گھر بن جاتی ہے
گھر میں دروازے، کھڑکیاں اور دیواریں ہوتی ہیں
چھتیں اور بالکونیاں
آرائشی بیلیں، پھول اور پودے ہوتے ہیں
اور کچھ لوگ
جو اٹھتے بیٹھتے، چلتے پھرتے، سوتے جاگتے،
باتیں کرتے، سانس لیتے ہیں

محبت بھی گھر کی طرح ہوتی ہے
دروازوں، کھڑکیوں اور دیواروں سے مل کر بنی ہوئی
کمروں، گوشوں، بالکنیوں، برآمدوں میں بٹی ہوئی
لوگوں سے بھری ہوئی
اور کبھی کبھی یہ اتنی گنجان ہو جاتی ہے
کہ سانس لینے میں دقت ہونے لگتی ہے
جب تک کوئی دروازہ وا نہ ہو
کوئی کھڑکی نہ کھلے
کسی گوشے، کسی جانب سے چلنے پھرنے
باتیں کرنے، ہنسنے رونے کی آواز نہ آئے

محبت ہمارے اندر رچ بس جاتی ہے
اور ہم میں رہنا شروع کر دیتی ہے
اور ایک دن
ہمیں ہمارے ہی گھر سے بے دخل کر دیتی ہے!