سرگودھا: فٹبال میچ کے دوران ہونے والی شدید لڑائی کے باعث کھیل کا میدان جنگ کے میدان میں تبدیل ہوگیا۔
تفصیلات کے مطابق یونیورسٹی آف سرگودھا میں فٹبال میچ کے دوران کھلاڑیوں میں شدید لڑائی ہوئی، جس کے نتیجے میں 10 کھلاڑی زخمی ہوگئے۔
رپورٹ کے مطابق معمولی تلخ کلامی کے بعد فٹبال کھلاڑیوں نے فائنل میچ میں ایک دوسرے کو ڈنڈوں، لاتوں اور گھونسوں سے تشدد کا نشانہ بنایا۔
اس دوران سرگودھا اور مردان ٹیم کے 10 کھلاڑی زخمی ہوگئے، پولیس نے اس موقع پر پہنچ کر حالات قابو میں کیے۔
پولیس کے مطابق میچ کے دوران ہونے والی لڑائی میں زخمی ہونے والے کھلاڑیوں کو طبی امداد فراہم کردی گئی ہے، ملوث کھلاڑیوں کے خلاف قانون کے مطابق کارروائی ہوگی۔
اس سے قبل بارسلونا کے شائقین نے غلطی سے اپنی ہی ٹیم کی بس پردھاوا بول دیا، مداح پیرس سینٹ جرمن کے ہاتھوں میچ ہارنے کے بعد آپے سے باہر ہوئے۔
فٹ بال شائقین اکثر اپنی پسندیدہ ٹیم کے ہارنے کے بعد جذباتی ہوجاتے ہیں، ایسا ہی کچھ بارسلونا کے مداحوں نے بھی کیا، گزشتہ روز انھوں نے کاتالان کے دارالحکومت میں اپنی ہی ٹیم کی بس پر غلطی سے پتھر اور پٹاخے پھینکے جبکہ کھلاڑیوں سے بدتمیزی بھی کی۔
باسلونا کی ٹیم کو چیمپیئنز لیگ کے کوارٹر فائنل میں پیرس سینٹ جرمن (پی ایس جی) کے ہاتھوں 1-4 کی عبرتناک شکست سے دوچار ہونا پڑا تھا۔
Facebook Comments