لاہور: پنجاب اسمبلی کے حلقہ 54 نارووال میں مسلم لیگ (ن) کے کارکن کی ہلاکت پر وزیر اعلیٰ مریم نواز کا اہم بیان سامنے آگیا۔
مریم نواز نے اپنے بیان میں بتایا کہ نارووال میں جاں بحق (ن) لیگی کارکن کے قاتلوں کو گرفتار کر لیا گیا ہے۔ انہوں نے کہا کہ پی ٹی آئی کی غنڈہ گردی کسی صورت برداشت نہیں کریں گے۔
وزیر اعلیٰ پنجاب نے کہا کہ سیاست خدمت اور اصلاح کا نام ہے تشدد اور عدم برداشت کا نہیں، سیاست کو ذاتیات اور تشدد کی حد تک پہنچانے والے قوم کے دشمن ہیں۔
پی پی 54 نارووال کے گاؤں کوٹ ناجو میں (ن) لیگ اور پی ٹی آئی کارکنوں میں تصادم ہوا تھا جس میں 60 سالہ (ن) لیگی کارکن محمد یوسف سر پر ڈنڈا لگنے سے جاں بحق ہوئے تھے۔
واقعے کے بعد وفاقی وزیر احسن اقبال کارکن کی ہلاکت کا سن کر اسپتال پہنچے تھے جہاں انہوں نے میڈیا سے گفتگو میں قتل کا الزام پی ٹی آئی پر لگاتے ہوئے کہا تھا کہ جن کی ایما پر سب ہوا انہیں بھی قانون کی گرفت میں لائیں گے۔
ادھر، الیکشن کمیشن نے ضمنی انتخابات کے دوران سیاسی کارکن کی ہلاکت کا نوٹس لے لیا۔ ترجمان ای سی پی نے بتایا کہ متعلقہ حکام سے واقعے کی رپورٹ طلب کر لی گئی۔
الیکشن کمیشن کے مطابق چیف الیکشن کمشنر نے ڈی پی او سے خود بات کی اور ذمہ داروں کے خلاف کارروائی کی ہدایت کی۔
Facebook Comments