کسان مارچ سے پہلے رہنماؤں کی گرفتاریاں عروج پر پہنچ گئیں/ اردو ورثہ

لاہور: کسان مارچ سے قبل رہنماؤں کی گرفتاریاں عروج پر پہنچ گئی ہیں، صدر کسان بورڈ کا کہنا ہے کہ پولیس پورے پنجاب میں کسان بورڈ رہنماؤں کی گرفتاریوں کے لیے چھاپے مار رہی ہے۔

تفصیلات کے مطابق صدر کسان بورڈ سردار ظفر حسین نے گرفتار ہونے والے رہنماؤں کی تفصیلات بیان کرتے ہوئے کہا کہ آج ہر صورت لاہور میں وزیر اعلیٰ پنجاب کے دفتر تک کسان مارچ ہوگا۔

انھوں نے بتایا چیئرمین کسان بورڈ پاکستان جام حضور بخش کو پولیس نے گرفتار کر لیا ہے، نائب صدر امان اللہ چٹھہ کو حافظ آباد سے گرفتار کیا گیا، فیصل آباد ڈویژن کے صدر علی گورایہ کو بھی گرفتار کیا گیا ہے، نائب صدر کسان بورڈ پنجاب میاں ریحان الحق کو بھی گرفتار کیا گیا۔

سردار ظفر کے مطابق کسان بورڈ ٹوبہ ٹیک سنگھ کے جنرل سیکریٹری سرور بھٹی، گوجرانولہ سے حمید الدین اعوان، چنیوٹ کسان بورڈ کے سابق صدر ذوالفقار شاہ کو بھی گرفتار کیا جا چکا ہے، غرض پورے پنجاب میں کسان بورڈ رہنماؤں کی گرفتاریوں کے لیے پولیس چھاپے مار رہی ہے۔

فیصل آباد سے کسان بورڈ کے ضلعی صدر علی احمد، جماعت اسلامی کے رہنما رانا عدنان اور عبدالستار بیگا، جھمرہ میں امیدوار صوبائی اسمبلی ضافر ادریس کے والد اور چچا، جماعت اسلامی کے رہنما ڈاکٹر بشیر صدیقی کا بیٹا اور بھتیجا بھی گرفتار ہو گئے ہیں، سمندری روڈ پر مرکزی صدر کسان بورڈ سردار ظفر حسین کے گھر پر پولیس نے چھاپا مارا تاہم وہ پہلے ہی گھر سے نکل کر لاہور پہنچ چکے ہیں۔

حافظ آباد سے کسان بورڈ پاکستان کے نائب صدر امان اللہ چٹھہ کا گرفتاری سے قبل ویڈیو پیغام سامنے آیا، جس میں انھوں نے کہا ’’مجھے گرفتار کیا جا رہا ہے، یہ انتہائی کمزور حکومت ہے جو پرامن احتجاج بھی برداشت نہیں کر سکی، ان حرکتوں سے احتجاج نہیں رکے گا، حکومت اتنی خائف ہے کہ رات میں گرفتاریاں شروع کر دیں۔

واضح رہے کہ لاہور میں آج جماعت اسلامی کے زیر اہتمام ’’حق دو کسان مارچ‘‘ 2 بجے ہوگا، امیر جماعت اسلامی حافظ نعیم کی قیادت میں وزیر اعلیٰ ہاؤس کا گھیراؤ کیا جائے گا، لیاقت بلوچ نے ایک بیان میں کہا ’’ہم کسان بورڈ کے رہنماؤں کی گرفتاریوں کی مذمت کرتے ہیں، کسان آج لاہور میں پرامن مارچ کریں گے پولیس اور انتظامیہ رکاوٹ نہ ڈالے۔‘‘

Comments