اڑنے والے غبارے میں موجود شخص نے سیاست پر گفتگو کرتے ہوئے اچانک فضا سے زمین کی جانب چھلانگ لگا کر خودکشی کرلی۔
میلبورن میں بیلون رائیڈ یعنی اڑنے والے غبارے میں سفر کے دوران 1500 فٹ کی بلندی سے مبینہ طور پر ایک شخص نے اچانک چھلانگ لگا دی۔ خود کو موت کے منہ میں پھینکنے سے چند لمحے قبل تک وہ بیلون کے پائلٹ سے سیاست کے بارے میں گفتگو کررہا تھا۔
واقعے کی فوٹیج میں مذکورہ شخص کو غبارے میں سوار دکھایا گیا ہے، وہ پیر کی سہ پہر تقریباً دس دیگر مسافروں کے ساتھ اڑنے والے غبارے پر سوار ہوا تھا۔
عینی شاہدین نے بتایا کہ جاں بحق شخص نے بھورے رنگ کا جمپر پہنا ہوا تھا، وہ غبارے کے ٹیک آف کے دوران ٹھیک لگ رہا تھا۔ وہ غبارے کے ہوا میں اڑنے کے دوران رائیڈ آپریٹر کے ساتھ سیاست کے بارے میں بات چیت کر رہا تھا۔
تاہم جب غبارہ اونچائی پر پہنچا تو اس آدمی نے اچانک بغیر کسی انتباہ کے ٹوکری کے کنارے سے نیچے چھلانگ لگا دی۔
غبارے کے پائلٹ نے فوری طور پر ایمرجنسی میں کال کی جبکہ وہاں موجود دیگر مسافر آدمی کو ہوا گرتے دیکھ کر خوفزدہ ہوگئے۔
ایک رہائشی نے مقامی میڈیا کو بتایا کہ اس کے بھائی نے سڑک پر کچھ گرنے کی زوردار آواز سنی تھی دیکھا تو وہ کوئی آدمی تھا۔ مذکورہ شخص کی موت کی اصل وجہ جاننے کے لیے تفتیش جاری ہے۔
پولیس کا کہنا ہے کہ غبارے میں موجود دیگر مسافروں اور گواہوں سے بات کی جارہی ہے تاکہ اس واقعے کے ارد گرد کے حالات کا تعین کیا جا سکے۔
Facebook Comments